Өчигдөр "Хурдтай хөгжлийн төлөөх зориг" хамтарсан Засгийн газрын гэрээнд МАН, АН, ХҮН намын дарга нар Төрийн ордонд гарын үсэг зурсан.
Гэвч АН-ын Дарга Л.Гантөмөр нам болон бүлгийн шийдвэрийг хүлээлгүй уг гэрээнд гарын үсэг зурсан аж. Энэ нь АН-аас сонгогдсон УИХ-ын гишүүдийг багагүй бухимдууллаа. Тухайлбал УИХ-ын гишүүн Ө.Шижир "Хамтарсан засгийн газрын гэрээг Ардчилсан намын ҮБХ, УТЗ, намын бүлэг гээд намын шийдвэр гаргах эрх бүхий аль ч бүтцээр хэлэлцэж батлаагүй. Манай намын бүлгээр эцэслэж хэлэлцэж батлаагүй. Одоо бүлэг хуралдаж байна. Ардчилсан намын нарийн бичгийн даргын үүрэг гүйцэтгэгч болон бүлгийн дарга хүртэл энэ гэрээн дээр эцэслэж санал өгөөгүй гэж бүлэг дээр ярилцаж байхад гэрээг нь зурж байдаг. Арай дэндүү байна шүү. Энэ гэрээг АН-н ажлын хэсгийн гишүүдэд 13:46 минутад өгөөд бүлэг 15:00 цагаас зарлаад одоо ч хуралдаж байна. Уг нь хурлын эхэнд бүлгийн дарга О.Цогтгэрэл ОХУ-ын сайд ирсэн учир намын дарга Лу.Гантөмөр чөлөө хүсэж байна гэж танилцуулсан. Гэтэл юун гадаад уулзалт, зочин хэлэлцүүлж дуусаагүй, санал аваагүй гэрээгээ зурж байж… АН-с сонгогдсон их хурлын гишүүд уг нь агуулга, заалт тус бүрээр нь ингээд хэлэлцэж байсан юмсан" гэж нүүр номоороо дамжуулан мэдээлсэн юм.
