Гадаадад байгаа иргэдийн сонгуулийн санал хураалтыг энэ оны зургадугаар сарын 20, 21, 22, 23-ны өдрүүдэд нийт 33 улсын 47 дипломат төлөөлөгчийн газраар амжилттай зохион байгууллаа. Нийт 13095 хүн санал өгөхөөр бүртгүүлснээс 9579 хүн буюу 73.2 хувь нь санал өгсөн байна. Тэд хувь тэнцүүлэх /пропорциональ/ аргаар нам эвсэлд саналаа өгснөөр УИХ-ын 48 гишүүнийг сонгоход саналаа өгч сонгуульд оролцож байгаа юм.
Гадаадад байгаа иргэд эдгээр дөрвөн өдрийн аль нэгэнд тухайн бүс нутгийнхаа цагаар 07:00-22:00 хооронд биечлэн ирж саналаа өгсөн. Ийнхүү өнөөдөр 13 цагт гадаадад байгаа иргэдийн санал хураалт албан ёсоор дуусжээ. Хамгийн сүүлд Улаанбаатар хоттой 15 цагийн зөрүүтэй Америкийн нэгдсэн улсын Сан-Франциско хот дахь ерөнхий консулын газарт тус үйл ажиллагаа өндөрлөсөн байна. Энэ талаар Гадаад улсад байгаа иргэдийн санал өгөх ажлыг зохион байгуулах комиссын дарга н.Амарсайхан мэдээлэл өглөө.
Тэрбээр "Монгол Улсын хэмжээнд хилийн чанад дахь бүх дипломат төлөөлөгчийн газар санал авах үйл ажиллагааг зохион байгуулсан. Нэгдсэн үр дүнг 2024 оны зургадугаар сарын 28-ний өдрийн 22:00 цагт СЕХ-ны байранд гаргана. Саналын хуудсыг тухайн иргэн өөрөө битүүмжлээд сонгуулийн комисст өгсөн. Тухайн хуудсыг дипломат шуудангаар Монгол улс руу авчирч төрийн хамгаалалтад байлгаж байна" гэв.
