Завхан аймгийн Улиастай сум зургаан багтай. Өчигдөр орсон борооны улмаас дөрвөн багт нь үерийн эрсдэл үүсчээ. Эдгээр багууд уулын хонхор хэсэгт байрладаг учраас үерийн эрсдэлтэй бүс гэж албаны эх сурвалж тодорхойлж байна.
Хамгийн их хохирол амссан нь Житнс баг. Тус багт 158 өрийн 449 иргэн үерийн голомтод нэрвэгджээ. Үерт өртсөн иргэдийг нүүлгэн шилжүүлэх, лаг шаврыг цэвэрлэх, халдваргүйтгэл хийх ажлуудыг үргэлжлүүлэн хийж байна.
Жинст багийн нутаг дэвсгэрт үерийн эрсдэлд өртсөн 73 өрхийн 255 иргэнд нийгмийн хамгааллын үйлчилгээ үзүүлээд байна. Тэдний 117 нь 0-18 насны хүүхдүүд, хөгжлийн бэрхшээлтэй 8, байнгын асаргаа шаардлагатай, тусгай хэрэгцээт 5 иргэн байжээ. Мөн сэтгэл зүйн цочролд орсон 64 иргэнд сэтгэл зүйн зөвлөгөө өгсөн байна.
ҮЕРИЙН УЛМААС 40-ӨӨД АЙЛ ОРОХ ОРОНГҮЙ БОЛЖЭЭ
Орон гэргүй болсон иргэдэд орон гэр олгох, шинэ суурьшлын бүс олгож нүүлгэн шилжүүлэх ажил хийгдэнэ.
Эдийн засгийн сургуулийн дотуур байр, Хөгжим бүжгийн коллеж зэрэгт нийт 80 орчим хүний ор дэр бэлдсэн. Энд гэр оронгүй болсон иргэдийг түр байрлуулах юм байна. Өчигдрийн тухайд үерт өртсөн айл өрхүүд хамаатан садангуудындаа очсон бол өнөөдрөөс түр хорогдох байранд ирж эхэлсэн аж. Одоогоор 20-иод энэхүү түр хорогдох газарт байрлуулаад байна.
