Ашигт малтмалын лицензтэй холбоотой нотлох баримтыг шинжлэн судлах сонсгол хоёр дахь өдрөө үргэлжилж байна.
Шинжээчийн дүгнэлтэд хамгийн өндөр өр, насжилт өндөртэй өрийн үлдэгдэлтэй аж ахуйн нэгжийн мэдээллийг танилцууллаа \Татварын ерөнхий газар. 2023.12.31 байдлаар\
МоЭнКо ХХК нь Ховд аймгийн Хөшөөтийн уурхайгаас нүүрс олборлодог 100 хувь гадаадын хөрөнгө оруулалттай компани юм.
Татварын өрөөр тэргүүлж буй эл компанийн Дэд захирал Ж.Оюунчимэг "Манай компани гадны хөрөнгө оруулалттай. 16 жил тасралтгүй хөрөнгө оруулалт хийж 2 мянга 600 хүнийг ажлын байраар хангаж байна. Улсдаа 8 дугаарт эрэмбэлэгддэг шилдэг татвар төлөгч" гэлээ.
МоЭнКо ХХК-ийн санхүүгийн захирал н.Энхдөл: АМНАТ-ийн өглөг байгаа тал дээр "татвар төлөгч өөрөө татвараа тооцоолон тайлагнаж төлнө гэдэг, ногдолоо өөрөө гаргана гэдэг хуулийг зөрчөөд автоматаар тайлагнадаг болчихсон". Бид яагаад татварын өрийг төлөхгүй, төлөх боломжгүй нөхцөл байдал үүсээд байгаа вэ гэхээр манай компани Хөшөөтийн уурхайгаас нүүрс олборлоод хуурай баяжуулах технологиор боловсруулаад гаргаж байгаа. Нүүрсний чанар, бидний Шинжаань Уйгарын зах зээлд борлуулж байгаа нүүрсний чанарт тохирсон зах зээлийн үнэ зарлагдахгүй байна.
Ашигт малтмалын тухай хуулийн 47.2.3-т "Хэрвээ экспортолсон нүүрсний зах зээлийн үнийг тодорхойлох боломжгүй бол гэрээний үнийг ашиглана" гэсэн байдаг. Зах зээлийн үнэ манай нүүрс дээр зарлагдахгүй байна. Тиймээс АМНАТ-ийн борлуулалтын үнэлгээг гэрээний үнээр үнэлж, тайлагнан тэр төлбөрөө гүйцэд цаг хугацаанд нь төлсөн.
УИХ-ын гишүүн Ш.Адьшаа: МоЭнКо ХХК 10 гаруй лиценз эзэмшиж байгаа, нөөц нь хэд байна.
АМГТГ-ын дарга Л.Баярмандал: Одоогийн байдлаар Хөшөөтийн ордны нөөц 174 сая тонн байна. Стратегийн ордод бүртгэгдээгүй.
УИХ-ын гишүүн Ш.Адьшаа: Хонгконг, Австралийн хөрөнгийн бирж дээр энэ компани 400 сая тонн нөөцтэй гэж хөрөнгө босгосон. Хулгай хийсэн юм уу? Залилан хийсэн юм уу, эсвэл эрдэс баялагийн газартай нийлж нөөцөө дарсан юм уу? Аль нь буруу аль нь зөв юм. 400 саяын нөөцтэй байсан бол стратегийн орд шдээ.
МоЭнКо ХХК-ийн дэд захирал Ж.Оюунчимэг: Анх бол 22 сая тонн нөөцтэй байсан. 2008 онд 85 тн, 2016 онд 87тн, 2024 онд 167 сая тонн нөөцийг эрдэс баялагийн мэргэжлийн зөвлөхөөр баталгаажуулсан.
