АН-ын Үндэсний бодлогын хуралдаан дөнгөж сая өндөрлөлөө. Хуралдаанаар 2024 оны УИХ-ын сонгуульд өрсөлдөх нэр дэвшигчдийн жагсаалтыг гаргасан ч шударга бус болсон гэж ҮБХ-ны гишүүд үзэж байна.
ЭДИЙН ЗАСАГЧ Б.ЛАКШМИ:
-АН жагсаалтад орж байгаа хүмүүсээ нэлээн нууцлаад байсан. Хэнд ч үзүүлэхгүй байж байгаад Улс төрийн зөвлөл хуралдаж байхад зэрэгцээд ҮБХ-ны хурал эхэлчихсэн. Энэ үеэс л гишүүдийн дунд эсэргүүцэл гарч байсан. Хурал эхлээд цаг гаруйн хугацаа үлдсэн байхад намын дарга Л.Гантөмөр орж ирээд “цаг хугацаа байхгүй байна. Тойргийнхоо хүмүүсийг эхлээд уншчихъя” гэсэн. Ингээд тойрогт нэр дэвшиж байгаа хүмүүсээ уншиж байхад нь зааланд нэлээн хүмүүс эсэргүүцээд эхэлсэн. Яагаад гэвэл тойрогт нэр дэвших хүсэлтээ илэрхийлсэн хүмүүсийг нь оруулахгүй, цоо шинэ өөр хүмүүсийг оруулж ирээд, батлуулах гээд нэрсийг уншаад эхэлсэн. Улмаар хүмүүс зөвшөөрөхгүй гэж суусан ч хүчээр зөвшөөрсөн мэт болгоод аваад гарчихлаа.
Дараа нь жагсаалтанд байгаа хүмүүс жагсаалтыг хүлээн зөвшөөрөөгүй. Учир нь улс төрийн зөвлөлөөр оруулж, батлаагүй гэх байр суурийг илэрхийлсэн. Намын дарга түр завсарлага авч гарч ирээд, буцаж орж ирэхдээ ямарч өөрчлөлт оруулалгүй нөгөө жагсаалтаа дахин уншсан. Мөн л цаг байхгүй гэх шалтгаанаар хүчээр баталсан болгож аваад яваад өгсөн.
