Ерөнхийлөгч Эбрахим Раиси тэргүүтэй албаныхан Ираны Азербайжантай хиллэдэг далан нээх ёслолын ажиллагаанаас буцаж явахдаа Варзакан мужид Ози болон Пир Давуд тосгоны хоорондох Дизмар ойн бүсэд осолджээ.
Ираны ерөнхийлөгч Эбрахим Раиси, Гадаад хэргийн сайд Хоссейн Амир-Абдоллахиангийн сууж явсан нисдэг тэрэг хойд бүс рүү явах замдаа осолдсоныг "IRNA" агентлаг Ням гаригт мэдээллээ. Нийт гурван нисдэг цуваагаар нисч явсан бөгөөд үлдсэн хоёр нисдэг тэргэнд нь бусад сайд, албаны хүмүүс байсан.
Нисдэг тэрэг осолдсон газар руу аврах ажиллагааны 20 баг болон нисгэгчгүй онгоц илгээжээ. Гэвч тухайн бүс нутаг нь уулархаг, ой мод ихтэй, өтгөн манантай байсан тул эрэн хайх, аврах ажиллагаанд цаг хугацаа шаардагдах аж. Нисдэг тэрэг осолдсоноос хойш хоёр цагийн дотор ослын голомтод цаг агаар эрс хүйтэрч, аврагчдын ажиллагаанд хүндрэл учрах магадлалтай болжээ.
Хамгийн сүүлийн үеийн мэдээллээр Эбрахим Раисигийн нисдэг тэргэнд нийт есөн хүн зорчиж явсан нь тодорхой болжээ. Тодруулбал, ерөнхийлөгч Эбрахим Раиси, Гадаад хэргийн сайд Хоссейн Амир Абдоллахиан, Зүүн Азербайжан мужийн захирагч Малек Рахмати, Тебризийн Баасан гаригийн залбиралын Имам Мохаммад Али Алехашем болон нислэгийн багийн гишүүд байсан.
