МАН энэ сарын 20-ны өдрөөр нэр дэвшилтээ дуусгавар болгоно. Дотоод журмынхаа дагуу нэр дэвшүүлэлтийг нээлттэй зарлан намынхаа гишүүдээс хүсэлтийг нь авсан. Хүсэлтээ өгсөн гишүүд маань орон даяар тойрч намын анхан шатын байгууллагуудад гишүүдтэйгээ очиж уулзаж өөрсдийгөө танилцуулах ажлыг зохион байгуулсан. Ингээд өнөөдрөөс эхлээд 7 хоногийн хугацаанд анхан шатны байгууллагад харьяалагдаж байгаа нийт намын гишүүдийнхээ дунд нэр дэвшигч, горилогч нарын талаар санал асуулгыг зохион байгуулаад эхэлсэн.
78 мажоритар мандат дээр нийт 140 орчим хүн хүсэлтээ өгсөн. Эдгээр хүмүүсийг нэгдүгээрт социологийн судалгаагаар олон нийтээс дэмжлэг авч байгаа байдлыг харгалзан үзнэ. Хоёрдугаарт намын анхан шатны байгууллагад харьяалагдаж байгаа гишүүдийн саналыг үндэслэж нэр дэвшүүлэх ажиллагааг зохион байгуулна.
Монгол Улсын Сонгуулийн тухай хуулиараа авлига албан тушаалын гэмт хэргээр шийтгэгдсэн, шүүхийн шийдвэр гарсан этгээд нэр дэвших эрхгүй. Манай намын тухайд энэ хуулийн заалтыг хэрэгжүүлэхийн сацуу намынхаа дүрэмд авлига, албан тушаалын гэмт хэрэгт яллагдагчаар татагдсан хүнийг нэр дэвшүүлэхгүй гээд тодотгоод заачихсан байдаг. Тэгэхээр бид нэгдүгээрт Монгол Улсынхаа хуулийг ягштал мөрдөнө, намынхаа дүрмийг сахина гэдгийг албан ёсоор мэдэгдэж байна.
