Өнгөрсөн долоо хоногт УИХ-ын чуулганыг завсарлуулж, гишүүд сонгогдсон тойрогтоо ажлаа тайлагнасан. Энэ үеэр галуу дагаж хэрээ хөлөө хөлдөөнө гэгчээр Соёлын сайд Ч.Номин өөрийн ажлаа тайлагнахаар сэтгүүл хэвлүүлэн иргэдэд тарааж, зарим нь хогийн саванд хаягдсан дүр зураг цахим орчинд тархсан. Соёлын сайдын хувьд УИХ-ын гишүүн биш учраас ингэх шаардлага байхгүйг хуульчид хэлж байгаа. Мөн тэрээр сонгуульд нэр дэвшихээр горилж буй бол энэ нь сонгуулийн сурталчилгааны хуулийн хугацаа эхлээгүй байхад далд сурталчилгаа хийсэн, хууль зөрчсөн үйлдэл болох аж.
Ганц Ч.Номин биш УИХ-ын гишүүн, Засгийн газрын гишүүн гэх давхар дээлтэй гишүүд ажлаа тайлагнах үеэрээ сайдын хувиар хийсэн ажлаа давхар тайлагнаж яваа нь мөн л хууль зөрчсөн үйлдэлд тооцогдоно гэж хуульчид тайлбарлалаа.
УИХ-ын Сонгуулийн тухай хуулийн 41.9-д "Монгол Улсын Их Хурлын гишүүн сонгуульд нэр дэвшихээр бол хийсэн ажлын тайлангаа энэ хуульд заасан нэр дэвшүүлэх ажиллагаа эхлэхээс өмнө тарааж болох бөгөөд үүнийг сонгуулийн сурталчилгааны материалд тооцохгүй" гэж заасан.
Тэгэхээр сайдын хувиар хийсэн ажлаа тайлагнаж буй хүмүүс хэрвээ сонгуульд нэрээ дэвшүүлбэл СЕХ-оос энэ үйлдлийг нь далд сурталчилгаа хийж хууль зөрчсөн гэж үзэх үндэслэлтэй юм байна.
Тиймээс тайлангийн сэтгүүл дээрээ ХНХ-ын сайд, УИХ-ын гишүүн гэж тодотгож өгсөн буюу сайд мөн гишүүний хувиар ажлаа тайлагнасан Х.Булгантуяа гишүүнээс эл асуудлаар тодрууллаа.
