Өмгөөлөгч хуульч Г.Батбаяртай холбоотой асуудлаар иргэний нийгмийн байгууллагуудын төлөөлөл мэдээлэл хийж, ар гэр, төрөл төрөгсдөд нь эмгэнэл илэрхийллээ.
Мөн түүнийг эх орон, газар шороо, уул усныхаа төлөө тэмцэж буй иргэний нийгмийн байгууллагуудтай үнэ хөлсгүйгээр хамтран ажилладаг байсныг онцлоод, ярьсан төлөвлөсөн ажлууд маш их байсан, яасан ч амиа хорлох үйлдэл хийхгүй гэдгийг тодотголоо.
Иймээс тэд түүний амиа алдсан хэргийг улс төрийн, зохион байгууллагатай аллага байсан гэж дүгнэж байгаа аж.
Мөн Г.Батбаярыг нас барсан байдалтайгаар өнгөрөгч баасан гарагийн орой олоод маргааш өглөө 9 цагт задлан шинжилгээ хийнэ гэж гэр бүлийнхнийг нь буцаачихаад тухайн шөнөө 12 цагт гэрийн бүлийнхэнд нь мэдэгдэлгүй задлан шинжилгээ хийсэн нь байж боломгүй үйлдэл, ямар нэг ул мөрийг мэдэгдэхгүй байлгах зорилгоор ийм зүйл хийсэн гэж хардаж буйгаа ч илэрхийллээ.
Тэд талийгаачийн үхэлд Шадар сайд С.Амарсайхан, ЭЗХ-ийн сайд Ч.Хүрэлбаатар, мөрдөн байцаагч н.Батцэрэн болон нэр бүхий зарим сэтгүүлчид хамааралтай гэж үзэж байгаа юм байна.
Түүнийг амь хохирсон байдалтай олдсон даруйд иргэний нийгмийн байгууллагын төлөөллүүд баасан гарагийн орой 23 цагийн орчимд Хан-Уул дүүргийн цагдаагийн газарт очицгоосон байна. Энэ үеэр цагдаагийн байгууллагаас иргэний нийгмийн байгууллагуудын төлөөллүүдээр нууцын баталгаа гаргуулж, энэ хэрэгтэй холбоотой аливаа мэдээлэл өгөхийг хоригложээ. Гэсэн ч тэдний хувьд уг хэргийн шалгалтын ажиллагаанд нөлөөлөл орох вий гэж үзэж байгаа учраас ийнхүү хэвлэл мэдээллийн байгууллагуудад хандаж байгаа аж.
Хэвлэлийн хурлын өмнө иргэний нийгмийн байгууллагуудын удирдлагуудруу цагдаагийн байгууллагаас холбогдож, мэдүүлэг өгөх, нууцын баталгаа гаргахыг шаардсан байна.
