Иргэдийн төлөөлөл өнөөдөр /2024.04.26/ Зайсангийн нэг чигийн урсгалыг эсэргүүцэж мэдээлэл хийлээ. Тэдний хувьд жил зургаан сарын турш энэ замаас болж түгжирч, түгжрэлээс үүдэн бизнесийн байгууллагууд хохирч, явган зорчигчид авто осолд орж буйгаа дурьдлаа. Мөн маргааш буюу бямба гарагт 11:00 цагт Зайсангийн тойруугийн баруун урд талын уулзвар буюу 32 дугаар сургуулийн урд хэсэгт тайван жагсаал хийхээ мэдэгдлээ. Тодруулбал,
- "Зайсангийн замыг нэг чигийн урсгалтай болгосноор дөрвөн замын уулзвар дээр маш ноцтой осол аваарь гарч байна. Тухайлбал нийслэлийн 32 дугаар сургуулийн зүүн урд талын явган хүний гарц дээр түгжрэл ихтэй үед замын хоёр урсгал түгжирч, иргэд аюулгүй замаар гарах боломжгүй болдог.
Сүүлийн нэг сарын хугацаанд дөрвөн хүүхэд зам гарахдаа машинд шүргүүлж, гэмтсэн. Зайсангийн замыг нэг чигийн урсгалд оруулснаас хойш нийт хичнээн хүүхдийн эрүүл аюулгүй байдалд амьдрах эрх нь хөндөгдөж, бэртэж гэмтэж байгааг хэлж мэдэхгүй байна.
Нийслэлээс Зайсангийн замын нэг чигийн хөдөлгөөнийг болиулах талаар 2024 оны дөрөвдүгээр сарын 12-19-ний өдрүүдэд санал асуулга явуулсан. Санал асуулгад нийт 3100 хүн оролцсоноос 2692 хүн буюу 86 хувь нь нэг чигийн хөдөлгөөнийг дэмжихгүй байна гэж хариулсан байхад ямар нэгэн арга хэмжээ авахгүй, судалгаа хийж байна гэдэг хариултыг өгч байна.Бүтэн жил зургаан сар болж байхад ямар ч арга хэмжээ авч, шийдэл хүрч, сайжруулсангүй. Зайсан орчимд амьдардаг иргэдээс гадна үйл ажиллагаа явуулдаг аж ахуйн нэгжүүд хохирч байна.
Үйлчлүүлэгчид нь замын нэг чигийн урсгалаас болж, түгжрэлд орохоос залхаж байна. Бизнесийн орчны эрх ашиг маш ихээр зөрчигдөж байна." гэв.
