МОНГОЛ УЛСААС БНХАУ-Д СУУХ ОНЦ БӨГӨӨД БҮРЭН ЭРХЭТ ЭЛЧИН САЙДААР НЯМААГИЙН ЭНХБОЛДЫГ ТОМИЛОХ ЭСЭХ АСУУДЛЫГ УИХ-ЫН ЧУУЛГАНААР ХААЛТТАЙ ХЭЛЭЛЦЭХЭЭР БОЛЛОО

Элчин сайд нарыг эргүүлэн татах болон томилох саналыг өнөөдрийн УИХ-ын чуулганы хуралдаанаар хэлэлцлээ. Монгол Улсын ерөнхийлөгчөөс

• Монгол Улсаас БНХАУ-д суугаа онц бөгөөд бүрэн эрхэт элчин сайд Т.Бадралыг эргүүлэн татаж, түүний оронд Н.Энхболдыг
• Монгол Улсаас Бүгд Найрамдах Индонез улсад суух онц бөгөөд бүрэн эрхэт элчин сайд Д.Энхтайвныг
• Монгол Улсаас бүгд найрамдах Узбекистан улсад суух онц бөгөөд бүрэн эрхэт элчин сайдаар Д.Батбаатарыг томилох саналыг гаргасныг ЕТГ-ын дарга Я.Содбаатар өнөөдөр УИХ-ын чуулганы хуралдаанд танилцуулсан.

Эргүүлэн татагдаж буй элчин сайд Т.Бадралын хувьд томилолтын хугацаа дууссан аж.

Харин БНИндонез улсын нийслэл Жакарт хотноо Монгол Улс элчин сайдын яамаа нээн ажиллууллахаар УИХ-ын 2013 оны 6 дугаар сарйын 7-ны өдрийн 43-р тогтоол шийдвэрлэн 2014-2017 онд үйл ажиллагаа эрхлэн явуулсан боловч эдийн засаг, санхүүжилтээс шалтгаалан УИХ-ын Аюулгүй байдал, гадаад бодлогын байнгын хороо 2017 оны 2-р сарын 1-ний өдрийн хуралдаанаараа тус элчин сайдын яамыг бүрх мөсөн татан буулгахгүйгээр санхүүжилтийг нь зогсоож, санхүүгийн бололцоотой болсон үед сэргээн ажиллуулахаар шийдвэрлэсэн байдаг. Индонез улсад суух элчин сайдын яамыг 2024 оноос сэргээхээр төлөвлөж айлын талаас зохих зөвшөөрлийг авсан тул ийнхүү элчин сайдыг томилохоор Ерөнхийлөгч санал болгож буй нь энэ аж.

Бүгд найрамдах Узбекистан улсын нийслэл Ташкент хотод элчин сайдын яамаа нээн ажиллуулахаар УИХ 2024 оны 1 дүгээр сарын 12-ны өдөр шийдвэрлэсэнтэй холбогдуулан тус улсад суух элчин сайдыг мөн томилохоор санал болгосон. 

Уг асуудлыг чуулганы хуралдаанаар хаалттай горимоор шийдвэрлэхээр боллоо.