Өнөөдрийн Засгийн газрын хуралдаанаар Хотын дарга Х.Нямбаатар Хот тосгоны эрхзүйн байдлын тухай хуулийн шинэчилсэн найруулгын төслийг танилцуулсан нь дэмжигдэж УИХ-д өргөн мэдүүлэхээр боллоо.
Энэ хуулиар 14 хот байгуулах болон төрийн үйлчилгээ очиж чадахгүй байгаа газруудыг тосгон болгон хөгжүүлэх асуудлыг тусгасан. Мөн уг хуулийг дагаад хотын эдийн засгийн асуудал давхар хөндөгдөж буй. Татварын зарим хуваарилалт тухайн хот тосгонд үлддэг байх асуудал тусгагдсан бөгөөд үүн дээр сангийн яамтай зөвшилцөлд хараахан хүрээгүй байгаа аж. Энэ талаар Хотын дарга Х.Нямбаатар:
Монгол Улс төрийн байгууламжийн хувьд нэгдмэл. Тэр ч утгаараа татварыг төвлөрүүлж, тэгшитгэн хуваарилах татварын суурь зарчимтай. Хот тосгоны эрх зүйн байдлын тухай хуулийг дагаж татварын зарим өөрчлөлт хийгдэнэ. Үүн дээр Сангийн яамтай өнөөдөр ч бүтэн ойлголцоогүй байна.
ААНОАТ-ын 40 хувийнхаа 20 хувийг улсруу өгнө. Орон нутаг 20 хувийг төвлөрүүлж авна. Суурин соёл иргэншлийн хэрэглээ үүсгэдэг НӨАТ-ын 20 хувийг хот тосгодод төвлөрүүлж авдаг байя гэж байгаа. Ингэж байж хот суурин газрууд өөрсдөө татварын орлогоо бүрдүүлж хот нийтийн аж ахуй, дэд бүтэц гэдэг зүйлсээ шийдээд явах юм. Бид өнгөрсөн 40 жилийн хугацаанд аймгийн төв, сумын төвүүд дээр дэд бүтцийн нэгдсэн бодлогогүй явлаа. Хог хаягдлаа шатаах үйлдвэр энэ улсад нэг ч байхгүй. Лаг боловсруулах үйлдвэр Монгол улсад ганц ч байхгүй. Лагаа бүгдийг нь ил гаргаад үмхий самхай үнэртэнэ. Иргэд нь үмхийгээ арилга гэдэг. Сүүлийн 60 жил сонсголон орчимд лагаа хатаагаад явж ирсэн юмыг бид яах юм. үүнийг арилгахын тулд эрх зүйн үндэслэл, төр хувийн хэвшлийн түншлэл, татварын орлого бүрдэж байж энэ бүхнийг шийднэ. Бүх суурин газрууд ийм маягаар явж байгаа" гэв
