Засгийн газрын өнөөдрийн хуралдаанаас гаргасан шийдвэрийн талаар Түгжрэлийг бууруулах үндэсний хорооны дарга, сайд Б.Дэлгэрсайхан мэдээлэл өглөө.
Өнөөдрийн хуралдаанаар энэ сарын 17-ны өдрийн Засгийн газрын хуралдааны үеэр ерөнхий сайдын өгсөн үүргийн дагуу Засгийн газрын хэрэг эрхлэх газар, Сангийн яам, Эдийн засаг, Хөгжлийн яам, Байгаль орчин, Аялал жуулчлалын яам, Хууль зүй, Дотоод хэргийн яамнаас хамтарсан Ажлын хэсэг гаргаж Хот, тосгоны эрх зүйн байдлын тухай хуулийг боловсруулж, хэлэлцлээ.
Энэ хүрээнд улсын болон орон нутгийн зэрэглэлтэй хот, тосгоны эрхзүйн байдал, нутаг дэвсгэр, түүний удирдлагын нэгжийг шилжүүлэх асуудлыг хуульчиллаа.
Ингэснээр улсын зэрэглэлтэй дөрвөн хот, 19 аймгийн төвийг орон нутгийн зэрэглэлтэй хот гэж нэрлэхээр болсон юм. Мөн өмнө нь хот гэж нэрлэж байсан хүн ам төвлөрсөн Эрдэнэт, Дарханыг орон нутгийн хот гэж нэрлэхээр боллоо.
Түүнчлэн Дорноговь аймгийн Замын-Үүд, Өмнөговийн Даланзадгад, Цогтцэций, Ханбогд сумыг цаашид орон нутгийн хот гэж нэрлэхээр боллоо.
