УИХ-ын сонгуулийн тухай хуулийн дагуу бие даан нэр дэвшигчийн мөрийн хөтөлбөрийг хянаж дүгнэлт гаргахаар Үндэсний аудитын газарт өнөөдрөөс хүлээн авч эхэллээ. Бие даан нэр дэвшигчдийн мөрийн хөтөлбөрийг өнөөдрөөс эхлэн 2024 оны 4 дүгээр сарын 25-ныг хүртэл хүлээн авна. Тодруулбал даваа, мягмар гарагт өглөө 08:30-21:00 цаг хүртэл, лхагва гарагт буюу 4 дүгээр сарын 24-нд 08:30-00:00 цаг хүртэл хүлээн авах аж.
Бие даан нэр дэвшигч нь мөрийн хөтөлбөрийнхөө эхийг хэвлэмэл байдлаар гурван хувийг дугтуйнд хийж битүүмжлэлтэйгээр авч очих ба мөн цахимаар хүргүүлэх юм.
Биечлэн очих боломжгүй тохиолдолд мөрийн хөтөлбөрийн хуудас бүрд гарын үсгээ зурж, иргэний үнэмлэхийн нотариатаар баталгаажуулсан хуулбар эсвэл хүчин төгөлдөр цахим лавлагааг хавсаргаж, шуудангаар хүргүүлэх боломжтой аж.
Бие даан нэр дэвшигч нь аудитын байгууллагатай итгэмжлэгдсэн төлөөлөгчөөр дамжуулан харилцах бол нотариатаар баталгаажсан итгэмжлэлтэй байх, итгэмжлэгдсэн төлөөлөгч солигдсон бол тухай бүрд нь мэдэгдэх аж. Тухайн нэр дэвшигчийн мөрийн хөтөлбөр хуульд заасан шаардлага хангаагүй тохиолдолд тав хоногийн дотор зөрчлийг арилгасны үндсэн дээр дүгнэлт гаргуулахаар дахин хүргүүлэх боломжтой юм байна.
