Хүний эрхийн үндэсний комиссоос ээлжит мэдээллээ хийлээ. Энэ үеэр ахмад настнууд гэр бүлийн хүчирхийлэл, үл хайхралд өртөх нь нэмэгдэж буй талаар онцоллоо.
Төвийн бүсийн хэмжээнд 47887 ахмад настан бүртгэгдсэн байдаг. ХЭҮК-оос 2022 онд Ахмад настны эсрэг хүчирхийллийн нөхцөл байдлын талаарх судалгааг хийхэд ахмад настай дөрвөн хүн тутмын нэг нь гэр бүлийн хүчирхийлэлд өртдөг байна гэж гарчээ.
Тодруулбал, ахмад настны 67 хувь нь сэтгэл санааны хүчирхийлэлд, 23 хувь нь үл хайхрах хүчирхийлэлд өртөж байна гэсэн дүгнэлт гарчээ.
Гэр бүлийн хүчирхийллийн улмаас хохирсон ахмад настны тоо 2021 онд 632 байсан бол 2022 онд 968 болж өссөн байна. Энэ бол зөвхөн хуулийн болон төрийн байгууллагад хандсан ахмадын тоо. Өөрөөр хэлбэл ахмад настны амь нас хохирсон, эрүүл мэндэд ноцтой хохирол учирсан тохиолдолд хуулийн байгууллагад ханддаг. Бусад тохиолдолд гэмт хэрэг, зөрчилд бүртгүүлэхгүй өнгөрөх тохиолдол олон гарч байгааг ХЭҮК-оос тодотголоо. Шалтгаан нь энэ төрлийн гэмт хэрэг, зөрчлийг ихэвчлэн гэр бүл, хамаатан садны хүрээллээс үйлддэг учраас ахмадууд тэр бүр хуулийн байгууллагад ханддаггүй байна.
Гэр бүлийн хүчирхийлэлд ахмад настнууд өртөх нь нэмэгдэж, орон гэрээсээ дайжиж буй тул зорилтот бүлгийн хэрэгцээ, хүйсийн ялгаатай байдалд нийцүүлж хамгаалах байр, нэг цэгийн үйлчилгээний төвийг төрөлжүүлэх шаардлага үүсч байгааг ХЭҮК-оос онцоллоо.
