Сүхбаатар аймгийн Засаг дарга М.Идэрбат, ИТХ-ын дарга Д.Хосбаяр, ГХБХБГ-ын дарга Э.Төгөлдөр нарыг Авлигатай тэмцэх газраас шалгаж байсан бөгөөд тэднийг 48 цаг саатуулжээ.
Тодруулбал, эдгээр хүмүүсийг АТГ-аас дөрөвдүгээр сарын 8-ны өдрөөс эхлэн дуудаж, шалгаж 48 цаг саатуулсан бөгөөд одоо цагдан хориог цуцлах эсэх шүүх хурал болж байгаа юм байна.
Мөн тэднийг яллагдагчаар татах хүсэлтийг хуулийн байгууллагад өгөөд байгаа гэж эх сурвалж мэдээллэв.
Эргэн сануулахад, Сүхбаатар аймгийн Засаг дарга М.Идэрбат болоод ИТХ-ын дарга Д.Хосбаяр нар дур мэдэн аймгийнхаа соёлын өвийн бүртгэлийн санд бүртгэлтэй “Алунгоо” эхийн хөшөөг уран бүтээлчдэд нь байтугай Соёл, урлагийн газартаа ч мэдэгдэлгүй “сэм хуйвалдаж, нам дарна” гэгчээр нэг л өглөө Дөрвөлж толгой дээрээс нь ховхлоод авчихсан.
“Оронд нь хоёр тэрбум гаруй төгрөгөөр Бурхан багшийн сэрэг дүр босгохоор Сүхбаатар аймгийн нутгийн зөвлөлтэй тохирсон. Холбогдох хүмүүст нь аман зөвшөөрөл өгсөн” хэмээн тэд том дуугарсан ч нутгийн иргэд үүнийг эсэргүүцээд байгаа талаар бид өмнө нь мэдээлсэн.
Сүхбаатар аймгийн Улаанбаатар хот дахь нутгийн зөвлөлийн дарга У.Отгонбаярын нэр нүүрт дулдуйдан, зөвхөн өөрсдийн эрх мэдлийн хүрээнд дээрх асуудлыг шийдвэрлэх гэж муйхарласан хоёр даргын үйлдэл Соёлын тухай хуулийг зөрчсөн болохыг Соёлын яамнаас албан ёсоор анхааруулж байжээ.
