Монгол Улсын Их Хурлын чуулганы хуралдааны дэгийн тухай хуулийн шинэчилсэн найруулгын төсөл болон хамт өргөн мэдүүлсэн хуулийн төслүүдийг хэлэлцэж эхэллээ.
УИХ-ЫН ГИШҮҮН Х.БОЛОРЧУЛУУН:
-126 гишүүнтэй болохоор хуучин 76 шиг хүн болгон үг хэлж чадахгүй. Тойргоос сонгогдсон бол арай илүү үг хэлэх байх. Энэ хуулийн төслийн ажлын хэсэгт би орж ажилламаар байна.
УИХ-ГИШҮҮН Н.ЭНХБОЛД:
-Энэ бол зөвхөн тоо өөрчлөгдсөн асуудал биш. Магадгүй цоо шинэ бүтэц, агуулгаар үйл ажиллагаа явуулах хэрэгтэй. Монголын парламентэд цоо шинэ үе эхэлнэ. Хоёр дахь том шатыг эхлүүлсэн. Том шийдвэрийг бид гаргасан. Тэрийгээ яаж амьдралд хэрэгжүүлэх вэ гэдэг л чухал байна.
Тойрог, жагсаалт хоёр дээр бид Үндсэн хуулиа л барьж байгаа. Үндсэн хуулиар УИХ-ын гишүүн бол бүгд ард түмний элч. Тойрог, жагсаалт алинч ялгаагүй.
УИХ-ЫН ГИШҮҮН Ж.БАТЖАРГАЛ:
-Үзэл баримтлалынх нь хувьд энэ хуулийг дэмжиж байгаа. Гэхдээ хэлэлцүүлгийн түвшинд анхаармаар зүйлүүд байгаа. Дэгийн хууль өөрөө холимог системээр сонгууль явуулдаг дэлхийн бусад орны хуультай хэр нийцдэг вэ гэж асуумаар байна. Тойргоос сонгогдсон 78 гишүүн арай ахиу дуугарах ёстой.
