Монгол Ардын Намын дэргэдэх “Социал демократ Монголын эмэгтэйчүүдийн холбоо”-ны Нийслэлийн салбар холбооны ээлжит бус хурал 2024 оны 04-р сарын 05-нд боллоо. Улаанбаатар хотын есөн дүүргийн 170 гаруй төлөөлөгч оролцсон тус хуралдаанаар Нийслэлийн салбар холбооны тэргүүнийг сонгож үйл ажиллагааны хөтөлбөр төлөвлөгөөгөө баталсан байна.
Намын дэргэдэх эмэгтэйчүүдийн байгууллагын нийслэлийн салбар холбооны даргаар Б.Ану-Үжин сонгогдлоо. УИХ-ын сонгууль болоход хоёр сар гаруйхны хугацаа үлдсэн энэ үед шинэ залуу боловсон хүчнээр удирдуулж байгаа нь намын зүгээс том хариуцлага хүлээлгэж байгаа хэрэг юм.
УИХ-ын, орон нутгийн цаашлаад Монгол Улсын Ерөнхийлөгчийн сонгууль гээд гурван том сонгуульд нийслэлийн эмэгтэйчүүдийн байгууллагыг манлайлан оролцоно. Мөн намын эмэгтэйчүүдийг чадавхжуулах, оролцоог нэмэгдүүлэх, шийдвэр гаргах түвшин дэх эмэгтэйчүүдийн хувийг нэмэгдүүлэх гээд түүний өмнө олон даваа бий.
Б.Ану-Үжин эдийн засагч, эрх зүйч мэргэжилтэй. АНУ-ын Линколн Их Сургуульд Бизнес удирдлагын магистрийн зэрэг хамгаалсан. Монголын анхны үнэртэй усны “Үжин” брэндийг үүсгэн байгуулагч, үл хөдлөх хөрөнгийн менежментийн компанийн гүйцэтгэх захирал юм.
Социал демократ Монголын эмэгтэйчүүдийн холбооны Нийслэлийн салбар хорооны даргаар 17 жил ажилласан УИХ-ын гишүүн Б. Саранчимэг “Монгол улсын хэмжээнд нийгмийн тулгамдаад буй ядуурал, эрүүл мэнд, боловсрол, байгал экологи, гэр бүлийн хүчирхийлэл, эмэгтэйчүүдийн эрх, хүүхдийн эрх, хүүхдийн эрүүл аюулгүй орчинд амьдрах нөхцөл боломж зэрэг олон асуудлуудад бодлогоо чиглүүлж, хүний эрх, жендерийн тэгш байдлын мэдрэмжтэй бодлого шийдвэрүүд гаргахад эмэгтэйчүүдийн үүрэг, оролцоо чухал шаардлагатай.Тиймээс бид бүгдээрээ нэгдэн нийлж, нэгнээ дэмжиж, үр хүүхдүүдийнхээ амьдрах эрүүл аюулгүй орчныг бүрдүүлж, өөрсдийн ажил хөдөлмөр эрхлэх боломж нөхцлийг төлөө дуу хоолойгоо нэгтгэцгэхийг уриаллаа.
Мөн МАН-ын Нийслэлийн салбар хорооны дарга Д.Сумъяабазар “Олон эмэгтэйчүүдийн дуу хоолой, үзэл бодлын индэр байж, тэдний тэгш эрх, оролцоог хангаж ажиллахын чухлыг онцлоод МАН-ын үнэт зүйл нь эв нэгдэл, зохион байгуулалт, хариуцлага юм. Иймээс үнэт зүйлээ эрхэмлэж, уламжлал, шинэчлэлийг хослуулж, залуу, дунд, ахмад үеийн хэлхээ холбоог хангаж ажиллах нь чухал” хэмээн хэлсэн юм.
