ЦУОШГ-ын Урьдчилан мэдээлэх хэлтсийн дарга Л.Оюунжаргал зудын үнэлгээ болон цасан бүрхүүлийн хэмжээ, цаг агаарын нөхцөл байдлын талаар өнөөдөр мэдээллээ.
Дөрөвдүгээр сарын 1-ний байдлаар Халхголын сав газраар хамгийн их цасан бүрхүүлтэй, Хяргас нуур, Завхан голын сав газраар хамгийн бага цасан бүрхүүлтэй байна. Голын сав газарт хуримтлагдаж буй цасанд агуулагдах усны хэмжээ их хэвээрээ байгаа аж.
Ойрын өдрүүдэд ихэнх нутгаар нэлээд дулаан байх төлөвтэй байна. Говийн бүс нутгийн төв болон баруун өмнөд хэсгээр нэлээд дулаарна. Одоогийн байдлаар эдгээр бүс нутгаар +15.. +20 градус. Говийн бүс нутгийн баруун өмнөд хэсгээр бороо, нойтон цас орж, ирэх өдрүүдэд үргэлжлэн орно.
Бусад нутгаар бороо, хур багатай байх тул голын сав газруудын цасан бүрхүүл эрчимтэй хайлж, шар усны үер ихсэхийг онцгойлон анхаарууллаа.
Харин Улаанбаатар хотын тухайд Сэлбэ голын эхээр мөсөн бүрхүүл ихтэй, мөсөн дээрх цас хайлмагтсан байдалтай байна. Голын сав газрын эхэнд цас хунгарласан хэвээр.
Сэлбэ голын адгаар мөсний хайлалтаас үүдэлтэй шар усны үер ажиглагдаж эхэлсэн байна. Усны түвшин 138см буюу үерийн түвшинд хүрчээ. Голын урсгалын хурд 0.7-1.5м/с. Иймд Сэлбэ голын дагуух айл өрхийг шар усны үерээс сонор сэрэмжтэй байхыг анхаарууллаа.
