Д.ТОГТОХСҮРЭН: БАЯЛАГИЙН САН ГУРВАН САЙДЫН МЭДЭЛД БАЙЖ БОЛОХГҮЙ, НЭГ САЙД ХАРИУЦАХ ЁСТОЙ

УИХ-ын өнөөдрийн чуулганаар Баялагийн сангийн тухай хуулийг хэлэлцэж байна. Үүнтэй холбоотойгоор УИХ-ын гишүүн Д.Тогтохсүрэнгээс тодруулга авлаа.

• Сан хамгийн гол нь ард иргэддээ өгөөж өгдөг байх ёстой. Уул уурхайн эдийн засагтай улсын нэг дутагдал нь Баялагийн сангаа зөв менежмент хийхгүй бол ард иргэдэд нөлөөлөхгүй байх юм. Эдийн засаг өндөр өсөлттэй гараад байдаг ард иргэдэд очиж байна уу гэхээр үгүй байдаг. Аж үйлдвэрийн ч юмуу хөдөө аж ахуйн эдийн засаг хүн дээрээ очоод байдаг. Ажлын байр нэмэгдүүлээд ч юм уу. Тийм учраас энэ баялагийн сангаар дамжуулах гэж байгаа юм. Гурван сан байна.

Эхнийх нь Ирээдүйн өв сан. Ирээдүйдээ зориулсан АМНАТ-ын 15 хувиар явдаг. Энэ жишгээрээ явж байна.

Хоёр дахь нь, Хуримтлалын сан. Энэ бол ногдол ашиг 34 хувиас үүсгэнэ. Гурав дахь нь Хөгжлийн сан. Үүний 50 хувь нь тогтворжуулалтын санруу, 50 хувь нь хөгжлийн санруу явна. Орлого даваад байвал хөгжлийн сан мөнгөтэй байна, оролго давахгүй бол хөгжлийн сан мөнгөгүй байна гэсэн үг.

Би бол үүн дээр менежментийн хувьд анхаарах ёстой юм байна гэж бодож байна. Хэлэлцүүлгийн явцад ажлын хэсэг гарах байх. Миний бодлоор нэгдүгээрт энэ гурван сайдын харъяанд байж болохгүй. Нэг сайд хариуцах ёстой. Хоёрдугаар ард түний нэрийн өмнөөс хөрөнгө захиран зарцуулах эрх ганцхан их хуралд байдаг. Өөр хэнд ч үүнийг өгч болохгүй. Би үүн дээр хатуу байр суурьтай байдаг.