БЗД-ийн 26-р хороонд гарсан газ дэлбэрсэн хэрэгтэй холбоотойгоор ХНХЯ, УУЯ, ЗТХЯ хамтарсан ажлын хэсгээс Дашваанжил компанид хөдөлмөрийн аюулгүй байдлын хяналт шалгалт хийсэн байна. Уг хяналт шалгалтын дүгнэлтийг өнөөдөр УОК-ийн мэдээллийн үеэр танилцууллаа.
Шингэрүүлсэн хийн түлшийг ОХУ-аас импортолж, хэрэглэгчдэд хүргэдэг Дашваанжил ХХК нь 518 ажилтантай, 63 салбар нэгжтэй, УБ хот болон 21 аймаг 30 сумдад үйл ажиллагаа явуулдаг.
Тус компанид хийсэн хяналт шалгалтаар хууль тогтоомж, хамтын гэрээ хэлэлцээрт нийцүүлж дотоод журмаа боловсруулаагүй, цалин хөлсний журам баталж мөрдүүлээгүй зэрэг хөдөлмөрийн харилцаатай холбооотой зөрчил илэрсэн байна. Мөн хөдөлмөрийн норм, норматив баталж мөрдүүлээгүй байжээ.
Дашваанжил ХХК шатах, тэсэрч дэлбэрэх бодистой арьцаж ажилладаг ч хөдөлмөрийн аюулгүй байдал хариуцсан тогтолцоо, ажилтангүй байсан аж. Мөн түүнчлэн ажлын байрны эрсдэлийн үнэлгээг хийлгээгүй. Аюултай нөхцөлд ажиллах,анхааруулах дохио, тэмдэг, санамж, цахилгааны аюулгүй байдлыг хангаагүй гэх зэрэг зөрчлүүд илэрчээ.
