Жолоочийн даатгалын тухай хуулийн 5 дугаар зүйлийн 5.1-д заасны дагуу тээврийн хэрэгслийн өмчлөгч бүр жолоочийн хариуцлагын даатгалд заавал хамрагдах үүрэгтэй. Харин тээврийн хэрэгслийн даатгал нь сайн дурын даатгалд хамаардаг.
Гэтэл зарим даатгалын компани жолоочийн хариуцлагын албан журмын даатгалыг тээврийн хэрэгслийн даатгалтай хамтад нь заавал даатгуулах зэргээр хууль бус шаардлага тавих тохиолдол нэлээдгүй гарч байгаа аж. Мөн гэрээ байгуулахдаа жолооч, даатгуулагчдад тухайн тээврийн хэрэгслийг жолоодох жолоочийн тоотой холбогдох сонголтуудыг танилцуулахгүйгээр жолоочийн тоог хязгааргүй байдлаар хийх тохиолдлууд ч гардаг байна.
Иргэний хуулийн 432 дугаар зүйл, Даатгалын тухай хуулийн 6 дугаар зүйлийн 6.2, 6.5-д заасны дагуу тээврийн хэрэгслийн даатгал нь сайн дурын даатгалын төрөл бөгөөд өөрийн сонголтоор сайн дурын даатгал юм.
Иймд иргэд, даатгуулагчид жолоочийн хариуцлагын албан журмын даатгалын гэрээ байгуулахдаа дээр дурдсан болон аливаа хууль бус шаардлагыг хүлээн зөвшөөрөхгүй байх эрхтэй аж.
Мөн хэрвээ хууль бус шаардлага тавибал тухайн даатгалын компанийн талаарх мэдээллийг Санхүүгийн зохицуулах хороонд бичгээр, цахим (info@frc.mn)-аар болон утас (51-266420, 51-261275, 51-261672)- аар мэдэгдэж болохыг санхүүгийн зохицуулах хорооноос зөвлөж байна.
Даатгалын тухай, Жолоочийн даатгалын тухай хууль болон бусад холбогдох хууль тогтоомжийн хэрэгжилтийг хангаж ажиллаагүй даатгалын болон даатгалын мэргэжлийн оролцогчийн үйл ажиллагаа эрхлэх тусгай зөвшөөрөл эзэмшигчдэд холбогдох арга хэмжээг Санхүүгийн зохицуулах хорооноос авч ажилладаг байна.
