Монгол Улсын Их Хурлын сонгуулийн тухай хуулийн 20.4 дэх хэсэгт “Улсын бүртгэлийн асуудал эрхэлсэн төрийн захиргааны байгууллага сонгогчдын нэрийн жагсаалтад байгаа сонгуулийн эрх бүхий иргэний эцэг /эх/-ийн болон өөрийн нэр, нас, хүйс, иргэний бүртгэлийн дугаар, байнга оршин суугаа газрын хаягийн бүртгэлийн мэдээллийг аймаг, сум, баг, нийслэл, дүүрэг, хороогоор болон хэсэг нэг бүрээр нэгтгэн гаргах бөгөөд уг жагсаалтыг ээлжит сонгуулийн жилийн 4 дүгээр сарын 01-ний өдрөөс эхэлж, сонгууль дуустал өөрийн цахим хуудсанд байршуулна” гэж заасан.
Уг хуулийн дагуу сонгогчдын УБЕГ-ын сайтад байршуулжээ. Иймд сонгогч та бүхэн хуулийн хугацаанд байршуулсан сонгогчдын нэрийн жагсаалттай танилцаж, бүртгэлийн мэдээллээ нягтлан, гэр бүлийн гишүүн бус хүн байгаа эсэхийг шалгаж гомдол мэдээлэл гаргах боломжтой.
Хэрэв таны мэдээлэл зөрүүтэй бол “МЭДЭЭЛЭЛ ЗӨРҮҮТЭЙ БОЛ МЭДЭГДЭХ” товчийг даран холбогдох утасны дугаараа оруулж, санал хүсэлтээ илгээх эсвэл Улсын бүртгэлийн байгууллагын салбар нэгжүүдэд биечлэн хандах боломжтой.
Иргэн та мэдээллээ шалгах явцдаа өөрийн аль нэг мэдээллийг буруу бичсэн тохиолдолд “АЛДАА: ӨГӨГДӨЛ ОЛДСОНГҮЙ” гэсэн бичвэр гарч ирнэ. Ийм тохиолдолд та хувийн мэдээллээ буруу оруулсан байх магадлалтай тул, үнэн зөв оруулсан эсэхээ шалгаж дахин нэвтрэхийг УБЕГ-аас анхаарууллаа.
УИХ-ын 2024 оны ээлжит сонгуулиар 2,189 сонгуулийн хэсэг байгуулахаар ИТХ-д шийдвэрлэсэн байна. Тодруулбал орон нутагт 330 сум 1,643 багт 1,680 сонгуулийн хэсэг байгуулжээ. Суманд багадаа 200-гаас 2,000 сонгогчийн дунд сонгуулийн хэсэг байгуулахаар тогтоосон байна. Харин нийслэлийн есөн дүүргийн 204 хороонд 509 хэсэг байгуулсан байна. Дүүрэгт 3,000-аас багагүй сонгогчийн дунд хэсэг байгуулахаар хуульд заажээ. Өмнөх сонгуулиар 2000 гаруй сонгуулийн хэсэгт санал авсан бол энэ жил хэсгийн тоо 110-өөр нэмэгдсэн байна.
