НИЙСЛЭЛ ХОТЫН БАРИЛГЫН ИХЭНХ ХУВЬ НЬ ГАЗАР ХӨДЛӨЛТӨД ТЭСВЭРГҮЙ БАЙНА.
Нийслэлийг тойроод газар хөдлөлтийн зургаан том хагарал байдаг. Жил бүр газар хөдлөлтийн давтамж инэмэгдэж байхад газар хөдлөлтөд тэсвэртэй барилгын тоо буурсаар байна.Цаг тухай бүрт сэргээн засварлах ажил хийгдээгүй болон даац хэтрүүлснээс болж уг тоо буурсаар байна. Жил бүрийн гуравдугаар сарын сүүлийн долоо хоногийн пүрэв гарагийн 16:00 цагт Засгийн газраас улс орон даяар гамшгийн зарлан мэдээллийн дуут дохио дуугаргаж, дадлага сургууль зохион байгуулах журам гаргасан. Уг журмыг өнөөдөр 17 дахь жилдээ 16 цагаас хэрэгжүүлэх юм.
Энэ өдрийг угтаж ОБЕГ, ШУА-ийн Одон орон гео физикийн хүрээлэнгийн Газар хөдлөл судлалын үндэсний мэдээллийн төв, Нийслэлийн Хот байгуулалт, хөгжлийн газрын Барилга байгууламжийн чанарын хэлтсээс хамтарсан мэдээлэл хийсэн ба нийслэлийн барилга байгууламж чанарын хэлтэс нийслэлийн хэмжээнд ашиглаж байгаа орон сууцны болон орон сууцны зориулалттай барилгад газар хөдлөлтийн үнэлгээ хийж пасспортжуулах ажлыг зохион байгуулж байгаа юм. Тус газраас 2011 оноос хойш орон сууц болон төрийн өмчийн сургууль, цэцэрлэг, эмнэлгийн 976 барилгыг пасспортжуулж, газар хөдлөлтийн үнэлгээ хийжээ. Уг барилгуудыг 2002 оноос өмнө барьсан бөгөөд 976 барилга пасспортжуулснаас 574 нь газар хөдлөлтөд тэсвэргүй, 205 нь хүчитгэн ашиглах боломжтой, 206 нь тэсвэртэй гэсэн дүгнэлт гарчээ.
Тэсвэргүй дүгнэлтэд орсон 574 барилга газар хөдлөлтийн эсрэг арга хэмжээ бүрэн бус, даацын бүтцийнх нь бат бөх байдал буурсан, нүдэнд харагдахуйц ан цав, хотойлт, хагаралт цууралт үүссэн байдалтай байна.
Холбогдох газруудаас ашиглах боломжтой 205 барилга дээр Жайкатай хамтран шийдэл сонгохоор ажиллаж эхэлсэн бол тэсвэргүй хэмээн дүгнэсэн 574 барилгыг буулгаж шинээр барихаар шийдвэр гаргажээ.
