Эрдэнэт Майнерс баг гэрээний үүргээ биелүүлээгүй хэмээн импорт тоглогч Corey Manigault олон улсын сагсан бөмнөгийн холбоо /ФИБА/-нд гомдол гаргаснаар ФИБА-с МСБХ-г 15000 Швейцарь франк буюу 50 гаран сая төгрөгөөр торгосон байна.
Үүний улмаас МСБХ-оос Эрдэнэт Майнерс багийн 2023-24 оны Үндэсний дээд лигийн 3-р байрны шагнал 75 сая төгрөг, оролцогч багуудад олгох 15 сая төгрөгийг тус тус олгохгүй түтгэлзүүлэхээр шийдвэрлэсэн төдийгүй Үндэсний дээд лигийн 2024-25 оны улиралд оролцох эрхийг хасчээ. Учир явдлыг тодруулбал,
Эрдэнэт Майнерс баг 2022-2023 оны улирлын өмнөх хамтарсан бэлтгэлээ 2022 оны 8 дугаар сард Бүгд найрамдах Серби улсад хийсэн байна. Тус бэлтгэлийн үеэр импорт тоглогч болох Corey Manigault-тай тамирчны гэрээ хийж, бэлтгэлд хамруулсан аж.
ФИБА-ны импорт тоглогчтой хийх гэрээний заалтын дагуу Эрдэнэт Майнерс багаас тухайн тоглогчийг эмчийн үзлэгт оруулах, эсвэл гурван хоног бэлтгэлд хамрагдсаны дараа гэрээ баталгаажих гэсэн заалтын дагуу хар тамхи болон эрүүл мэндийн шинжилгээ өгөх шаардлагыг тус тоглогчид тавьсан байна. Гэтэл тамирчин уг шаардлагыг биелүүлээгүй мөн зан чанарын хувьд маш том алдаа дутагдалтай тоглогч байсан тул багийн удирдлагууд түүнтэй хийх гэрээгээ цуцлах шийдвэр гаргажээ. Ингээд багийн зүгээс Бүгд Найрамдах Серби улс хийх нэг сарын бэлтгэлд төлөвлөсөн 1 сарын цалинг бүтэн төлж гэрээний дагуу Corey Manigault-т 3 хоног бэлтгэл хийснийх нь цалинг олгож, 2 талын нислэгийн тийз болон нэмэлт зардлуудыг бүтэн төлөөд нутаг буцаасан байна.
Харин Corey Manigault болон түүний агент ОУСБХ /FIBA/ -д гомдол гаргаж бүтэн улирлын цалин болон агентын төлбөрийг бүтнээр нь нэмэхжилсэн байдаг.
Тус нэхэмжлэхийн дагуу Эрдэнэт майнерс баг нт Corey Manigault болон түүний агенттай холбогдож төлбөрийг барагдуулах тал дээр тохиролцохыг оролдсон ч тус агент болон тоглогч Corey Manigault нарын хоорондын үл ойлголцол, өндөр дүнтэй нэхэмжлэхийн улмаас хэлцэл тохиролцооны дагуу явахгүй байдалд хүрээд байгаа аж.
Тэдний хооронд үүссэн уг асуудлаас болж МСБХ–нд торгууль тавигдсан учир ийнхүү багт олгогдох байсан шагналын мөнгөнүүдийг олгохоос татгалзаж, ирэх улиралд тоглох эрхийг нь хасаад байна. Мөн 4 дүгээр сарын 25-ны дотор уг асуудлаа шийдвэрлэхийг даалгалаа.
