Ээжийгээ хөнөөсөн өсвөр насны хүүг олон нийтийн оролцоотойгоор шүүх хурал болж, хүнд шийтгэл оноолоо.
Тодруулбал, Чонжү дүүргийн Эрүүгийн хэргийн анхан шатны 11-р хэсэг тангарагтны шүүгчийн дүгнэлтийг хүлээн авч, хүн амины хэргээр яллагдагчаар татагдсан А-д /15 настай/ 20 жилийн хорих ял оноолоо.
Өнгөрсөн жилийн Чусокийн үеэр Чонжү хотын Сангданг дахь байранд өөрийг нь загнаж байсан ээж Б-г (40 орчим насны) хүйтэн зэвсгээр амь насыг нь хохироосон хэргээр А-г шүүсэн байна. Хэрэгтнийг хэрэг үйлдснээс 1 цаг 10 минутын дараа орон сууцныхаа ойролцоох цэцэрлэгт хүрээлэнгээс цагдаа нар баривчилжээ.
А-гийн өмгөөлөгч “Шүүгдэгч нь бага наснаасаа сэтгэцийн эмгэгтэй, сэтгэл хөдлөл, зан авираа хянах чадваргүй, нийгмийн нөхцөл байдлыг шүүн тунгаах чадваргүй болсон” тул "Шүүгдэгчийг насанд хүрээгүй хүүхдийн тасагт явуулах шийдвэр гаргах шаардлагатай" гэж мэдэгджээ. Харин Улсын дээд прокурорын газраас явуулсан сэтгэцийн үнэлгээний дүнгээр А-г хэрэг гарах үед зөв бурууг ялгах, үйлдлээ хянах чадвартай байсан нь тогтоогдсон гэж үзэж, 20 жилийн хорих ял хүсчээ.
Улмаар тангарагтны шүүгч нар санал нэгтэйгээр А-г гэм буруутайд тооцож, 20 жилийн хорих ял оноолоо.
Орчуулсан: Э.Тунгалаг
