"Үндэсний аюулгүй байдалд нөлөөлж болохуйц худал мэдээлэл тараасан" гэх Т.Бат-Эрдэнэд холбогдох хэргийн шүүх хурал өнөөдөр /2024.03.27-нд/ Чингэлтэй дүүргийн Эрүүгийн хэргийн анхан шатны шүүхэд болно.
Хэргийн талаар эргэн сануулахад, Монгол Улсын иргэн Т.Бат-Эрдэнэ нь 2023 оны наймдугаар сарын 30-ны өдөр "Чагнаа Чаагий" гэх нэртэй фейсбүүк хаягаас "Монгол Улсын хилийн отрядыг нүүлгэн шилжүүлж, улсын нутаг дэвсгэрээс БНХАУ-д шилжүүлэн өгөх гэж байна" гэх худал мэдээлэл нийтэлсэн. Мөн есдүгээр сарын 13-ны өдөр нэр бүхий хаягаас "Казак иргэдийг хүмүүжүүлж залхаан цээрлүүлэх зорилгоор томоохон ажиллагаа явуулахаар шийдвэрлэсэн байна. Бид та бүхэнд буу зэвсэг, галт хэрэгслээр туслах болно. Бүгдээрээ хамтдаа тэмцэж Засаг төрийг эргүүлцгээе", "Баян-Өлгий аймагт дайчилгааны хээрий сургуулилт хийгдэж байна. Энэ нь тус аймгийн иргэдийг айлган сүрдүүлэх зорилготой гэх утга агуулга бүхий худал мэдээллүүдийг тараасан болохыг Тагнуулын ерөнхий газраас тогтоосон байдаг. зүйл нийтэлсэн байдаг.
Тиймээс тухайн иргэнийг яллагдагчаар татан, мөрдөн шалгаж, улмаар прокуророос Эрүүгийн хуулийн 19.9-1 дэх хэсэг Үндэсний эв нэгдлийг бусниулах, Эрүүгийн хуулийн 13.14-1 дэх хэсэг Худал мэдээлэл тараах гэсэн зүйл ангиар яллаж, хэргийг Чингэлтэй дүүргийн Эрүүгийн хэргийн анхан шатны шүүхэд шилжүүлээд байгаа юм.
