УИХ-ын чуулганы хуралдаанаар 2023 оны хөгжлийн хөтөлбөрийн биелэлтийн асуудлыг хэлэлцэж байна. Тайланд тусгагдсан асуудлаас УИХ-ын гишүүн Г.Мөнхцэцэг олимпод оролцож байгаа тамирчдын бэлтгэлийг хангахтай холбоотой тодуулга авлаа.
Олимп, нийтийн биеийн тамир, спортын сайд Б.Бат-Эрдэнэ:
Ер нь бол биеийн тамир спортын салбар орж байгаа төсөв нэмэгдэж байгаа. Нийт төсөв 2021 онд 58 тэрбум байсан бол энэ жил 144,5 тэрбум төргөрөөр батлагдсан. Хөрөнгө оруулалт 32,7 тэрбум байсан бол энэ жил 72,3 тэрбумаар хөрөнгө оруулалт, бүтээн байгуулалт, засварын ажил хийгээд явж байна.
Олимпын шигшээ багийн бүрэлдэхүүн, олимпын бэлтгэлийг хангах асуудал төлөвлөгөөний дагуу хэвийн явагдаж байгаа. Олимпын бэлтгэлийг хангахад төр хувийн хэвшлийн түншлэл, төрийн зарим чиг үүргийг төрийн бус байгууллагаар гүйцэтгүүлэх хүрээнд спортын 27 холбоотой гэрээ байгуулаад явж байгаа. Спортын холбоодууд шигшээ багаа байгуулна, тамирчдаа сонгон шалгаруулна, дасгалжуулагчдаа томилно. Бүх хариуцлагаа гэрээний үндсэн дээр хүлээгээд ажиллаж байгаа.
Өнөөдрийн байдлаар олимпын спортын төрлөөр 11, паралимпын төрлөөр 4 нийтдээ 15 эрх авсан. Бид энэ олимпод 55 эрх авч оролцох зорилго тавиад байгаа.
2018 онд олимпын 1 тамирчинд 31-32 сая төгрөг зарцуулж байсан бол 2023 онд 43-44 сая төгрөг, 2024 онд 83-84 сая зарцуулж байна. Энэ бол тамирчдын асуудлыг бүрэн хэмжээнд шийдэж байгаа зүйл биш, гэхдээ тодорхой хэмжээнд нэмэгдсэн.
