УИХ-ын чуулган үдээс хойших хуралдаанаар үргэлжилж байна. Хуралдаанаар цэвэрлэх байгууламжтай холбоотой ажил удааширсан, зогсонги байдалд орсон асуудлуудыг УИХ-ын гишүүн Б.Баярсайхан холбогдох хүмүүсээс тодруулж, хариулт авлаа.
БАРИЛГА ХОТ БАЙГУУЛАЛТЫН САЙД Ц.ДАВААСҮРЭН:
-Завхан аймгийн цэвэрлэх байгууламж дээр 2 асуудал байгаа. Тендер шалгаруулалт юу болсныг нягталж үзэх хэрэгтэй. Тендер төсөвтөө багтахгүй болчихлоо нэмэлт хөрөнгө гээд сууж болохгүй. Ажлын хэсэг дүнгээ танилцуулах байх. Түүний дараа нэмэлт ажил, багтахгүй байна, нэмэлт хөрөнгө гээд байгаа асуудлыг шаардлагатай бол Сангийн яаманд тавина. Анхнаасаа тендерт оролцохдоо багтаана гэчихсэн бол төсөвлөсөн санхүүжилтээр хийлгэнэ. Дархан дээр ч цэвэрлэх байгууламжийн ажил ийм болсон. Дорнод дээр ч бас шалгарсан компани нь хаяад явчихсан.
Хоёрдугаарт, Төслийн нэгжийн удирдлагад мэргэжлийн бус хүн тавьсан. Сувилагч гэлүү дээ. Ийм нарийн өндөр технологийн төслийг мэргэжлийн бус хүн авч явна гэж байхгүй л дээ. Өмнө нь АХБ-ны 8,9 аймаг дээр хэрэгжсэн төсөл бас бүтэлгүйтсэн, үр дүн муутай цэвэрлэх байгууламжуудын төслийг засах ажлыг хийж байгаа.
БШУЯ-НЫ ТНБД Г.БАТЖАРГАЛ:
-“17 аймгийн 296 сумын 802 обьектод цэвэрлэх байгууламж байгуулах томоохон төсөлд ихэвчлэн сургууль цэцэрлэгүүдийг хамруулж, дөрвөн үе шаттай хэрэгжиж байна. Эдгээрээс одоогоор 261 нь ашиглалтад орсон, 22 нь улсын комисс ороход бэлэн болсон байна. Барилга угсралтын ажил үргэлжилж байгаа, цаг уурын нөхцөл байдлаас шалтгаалаад цаг хугацааны хувьд хүлээгдэж байгаа 253, барилга угсралтын тендер зарлагдсан 70 гэх мэтчилэн дөрвөн үе шатанд эдгээр ажил үргэлжлэн явагдаж байна.
Төслийн хүрээнд хоёр сургууль тутмын нэг, гурван цэцэрлэг тусмын нэг цэвэрлэх байгууламжид хангагдахаар төлөвлөгдсөн. Төсвийн тухайд гүйцтэтгэлээр нь 60 орчим тэрбумын санхүүжилт хийгдсэн. Анх 100 тэрбум батлагдсан ч зураг төсөв тодорхой биш байсан. Гэхдээ төсөв батлагдсан. Зураг төсвийг нарийвчлаад олон аймаг сумд өргөнөөр хамрагдаж байгаа учраас цэвдэг, геодизийн асуудлаас болж төсөв өөрчлөгдсөн. Иймд мэргэжлийн байгууллагын дүгнэлтээр 60 тэрбумын санхүүжилтийг нэмж баталсан” гэв.
