АН-аас цаг үеийн асуудлаар мэдээлэл хийж байна. АН-аас 2024 оны мөрийн хөтөлбөртэй иргэдээс санал авч орохоор 21 аймаг 9 дүүрэгт ажилласан. Энэ тайлангаа өнөөдөр танилцуулав. Хэрэв АН засаг авсан тохиолдолд бидний хэрэгцээ шаардлага болоод байгаа хэд хэдэн асуудлыг тусгаж өгөөч гэж салбар бүрийн мэргэжлийн холбоод хандаж байна. Өнгөрсөн найман жилийн хугацаанд нэмэгдсэн Нийгмийн даатгалын шимтгэлийг багасгаж өгөөрэй, иргэдийн халаасруу орж юм л бол торгодог асуудлыг болиулж өгөөрэй гэхчлэн олон нийт хүсч байна гэж мэдээллэв.
УИХ-ЫН ГИШҮҮН Ц.ТУВААН:
-Энэ онд Монгол оронд тохиолдсон байгалийн гамшиг, зудын асуудал хүнд байна. Зудын дараах нөхцөл байдлаас хэрхэн хохирол багатай гарах вэ гэдэг дээр АН-аас нэлээд санал гаргаад явж байна.
Гаалийн татвараас гурил, тэжээлийг чөлөөлөх асуудал байнгын хорооны хуралдаанаар ороод УИХ-аар хэлэлцэгдэх гэж байна. Бид малчдын зээлийг тэглэх асуудлыг хөндөж байгаа. Ямар нэг байдлаар мал нь хорогдоогүй малчид үүнд хамрагдахгүй. Мөн Хөдөлмөр эрхлэлтийг дэмжих санд 100 тэрбум байгаагаас, 20-30 тэрбумыг Малжуулах хөтөлбөрт оруулах боломжтой гэсэн. Энэ мөнгө хаана ч хүрэхгүй. Бага мөнгө. Байгалийн гамшигт үзэгдэл болдгоороо болсон. Одоо нөхцөл байдал улам дордож байна.
Малчдын хүндрээд байгаа гол асуудал малын гаралтай бүтээгдэхүүнийг зарж борлуулахад зах зээл дээр нь хязгаарлалт тавьчихаад байгаа явдал. Махаа зарах гэхээр нөөцийн мах гараад ирдэг, арьс ширээ зарах гэхээр боловсруулдаг үйлдвэр байхгүй. Арьс ширний үйлдвэрүүдийг хэт улстөржиж зогсоосон. Өөрөөр хэлбэл, түүхий эдийн үнэгүйдэл хэт улстөржилттэй холбоотой гэж бид үзэж байна.
