Өнөөдрийн Засгийн газрын хуралдаанаар хүүхдийн мөнгө олгох журамд өөрчлөлт оруулахаар шийдвэрлэсэн байна.
Манай улсын хэмжээнд 20 байгууллагын 29 халамж асрамжийн төвд 0-18 насны 924 хүүхэд байдаг. Эдгээр хүүхдүүдийн 14 болон түүнээс дээш насныхан нь хүүхдийн мөнгөнийхөө 20%-ийг өөртөө, өөрсдийнхөө дугуйлан секц, хөгжлийн үйлчилгээнд зарцуулах эрхийг нь нээж өгч байгаа аж. Монгол Улсын хууль тогтоомжийн дагуу 14-өөс дээш насны хүүхэд хагас эрх зүйн чадамжтайд тооцогддог байна.
Асрамжийн төвд байгаа хүүхдүүд бэлэн мөнгөтэй огт харьцаж суралгүй насанд хүрчидэгийг ХНХ-ын сайд Х.Булгантуяа онцоллоо. Мөн тэрээр,
“Асрамжийн төвд нэг айлын 4 хүүхэд байлаа гэхэд жилд хүүхдүүдийнх нь нэр дээр нийтдээ 5 сая төгрөгийн хүүхдийн мөнгөн хадгаламж үүсчихдэг. Тэгэхээр зарим эцэг эхчүүд хүүхдүүдийнхээ “Хүүхдийн мөнгө”-ний хуримтлал үүсэхээр хүүхдээ аваад бүх мөнгийг нь зарцуулчхаад буцаад асрамжийн төвд өгөх, эсвэл хүчирхийлэл үйлдээд эцэг эхээс нь тусгаарлахаас өөр аргагүй болгодог” талаар хэллээ.
Ийм учраас хүүхдээ асран хамгаалаагүй хугацаанд буюу хүүхдийг нь асран хамгаалах үүргийг төрийн болон төрийн бус байгууллагуудын асрамжийн төв дээр байлгах хугацаанд хуримтлагдсан хүүхдийн мөнгийг эцэг эх нь зарцуулах эрхийг нь журмын шинэчлэлээр хааж байгаа аж. Ингэснээр хүүхдийн нэр дээр 18 нас хүртэл мөнгөн тэтгэмж нь хуримтлал байдлаар үүсч, хүүхэд 18 нас хүрээд өөрөө захиран зарцуулах эрх нь нээгдэх юм байна.
