Өнөөдөр Засгийн газрын хуралдаанаар тэтгэврийн сангаас болон халамжийн сангаас олгох тэтгэвэр тэтгэмжийн хэмжээг нэмэгдүүлэх тухай Засгийн газрын төсөл орж дэмжигдлээ. Энэ талаар ХНХ-ын сайд Х.Булгантуяа мэдээллээ.
“Нийгмийн даатгалын сангаас олгож байгаа болон цэргийн алба хаасны тэтгэвэр авагчийн тэтгэврийн хэмжээг бид 2024 оны 4 дүгээр сарын 1-ний өдрөөс эхлэн 100 мянган төгрөгөөр нэмэгдүүлэхээр ЗГ-ын хурлаар шийдвэрлэлээ. Энэ арга хэмжээнд 499,2 мянган тэтгэвэр авагчид хамрагдаж нийтдээ 449,3 тэрбум төгрөг зарцуулна.
Дундаж тэтгэврийн хэмжээнд 685,6 мянган төгрөг байгаа бол 4 сарын 1-нээс нэмэгдсэнээр 785,6 мянган төгрөг болно.” гэлээ.
Ийнхүү 9 сарын хугацаан дотор дундаж тэтгэврийн хэмжээ 550 мянган төгрөгөөс 787 орчим мянган төгрөг болж нэмэгдэж байна.
Үүнтэй зэрэгцэн мөн хувь тэнцүүлсэн тэтгэврийн доод хэмжээ 440 мянган төгрөгөөс 100 мянган төгрөгөөр нэмэгдлээ. Ингэснээр дундаж тэтгэврийн хэмжээ 2019 онд 372,5 мянган төгрөг байсан бол ийнхүү 2,1 дахин нэмэгдэж байна.
