Сүүлийн саруудад Өмнөд солонгост, тэр дундаа Сөүлийн Юнпёнгу, Ганнам хотуудад өндөр настай жолооч нар осолдсон хэд хэдэн осол гарчээ. Цагдаа нар хайхрамжгүй байдлаас болж осол гарах магадлал өндөр байна хэмээн үзэж байна.
Тухайлбал, 80 гаруй настай А-ийн жолоодож явсан тээврийн хэрэгсэл гарцаар гарч байсан гурван хүнийг мөргөж, мөргүүлсэн хүмүүс газар дээрээ нас баржээ. Прокуророос жолооч А-д таван жилийн хорих ял оноосон байна.
Мөн өнгөрсөн сарын 29-нд Сөүл хотын Юнпёнг-гу хотод 70 орчим насны жолоочийн жолоодож явсан автомашин явган зорчигч болон тээврийн хэрэгслийг мөргөж, нэг хүн нас барж, 13 хүн гэмтсэн бол 17-ны өдөр Ганнам хотод 80 орчим насны жолооч 7 машинтай мөргөлдсөн осол гарчээ.
Тэд бүгд согтуугаар тээврийн хэрэгсэл жолоодсон биш ч харин анхаарал болгоомжгүйгээс болж гарсан осол байж болзошгүй гэж цагдаагийнхан үзэж байна.
ӨНДӨР НАСТАЙ ЖОЛООЧ НАР ЖОЛООНЫ ҮНЭМЛЭХЭЭ БУЦААН ӨГӨӨД УРАМШУУЛАЛ АВДАГ СИСТЕМ БНСУ-Д ХЭРЭГЖДЭГ
БНСУ-д 65 ба түүнээс дээш насны жолооч нартай холбоотой осол жил бүр нэмэгдэх хандлагатай болсон байна. Уг тоо 2020 онд 31,000 байсан бол өнгөрсөн онд 39,000 болж 8,000 гаруйгаар нэмэгдэж, нас барсан хүний тоо ч нэмэгджээ.
Ялангуяа 75 ба түүнээс дээш наснаас эхлэн осолд өртөх эрсдэл нэмэгддэг бөгөөд энэ нь бие махбодийн хөгшрөлтийн улмаас тээврийн хэрэгсэл жолоодох чадвар буурсантай холбоотой гэж үздэг байна.
БНСУ-д сайн дураараа жолоодох эрхийн лицензээ буцаах систем хэрэгждэг. Өндөр настай жолооч нар жолооны үнэмлэхээ сайн дураараа хүлээлгэн өгвөл нэг удаагийн төлбөрт 100-200 мянган воны үнэ бүхий тээврийн карт эсвэл бэлгийн гэрчилгээгээр солидог байна.
Уг систем хэрэгжээд 10 гаруй жил болж байгаа ч бодит үр дүн ердөө 2 хувь орчим байгаа тул бодитой үр дүнд хүрэхгүй байна гэж албаныхан үзэж байгаа юм байна.
Орчуулагч: Э.Тунгалаг
