1987 онд өнөөгийн Эх хүүхдийн эрүүл мэндийн үндэсний төвийн барилга ашиглалтад орж улсын хэмжээнд тусламж үйлчилгээ үзүүлсээр өдгөө 37 жил болж байна. Энэ хугацаанд иж бүрэн засвар хийгдээгүй зарим газраа бохир нь задарч өтгөн шингэнтэйгээ холилдсон газарт бид ирээдүй хойч болсон үр хүүхдүүдээ өлгийдөн авч байна гэдэг эмгэнэл гэхээс өөр юу гэж хэлэх вэ?
Улсын хэмжээнд жилд 77 мянган эх амарждаг гэх тоо байдгаас 12 мянга нь нийслэлийн Баянгол дүүрэгт байрлалтай ЭХЭМҮТ-д амарждаг байна. Гэтэл төрөхөөр очсон ээжүүд ор хүрэлцээгүй коридорт хэвтэх энүүхэнд болж.
ЭХЭМҮТ-д төрөх дөхсөн эхчүүд ор хүлээж эмнэлгийн коридорт 3 хонож байв… /2023 оны 10 сар/
Хог шаар шиг л амьдрах юм энэ улс оронд өнөө маргаашгүй төрөх гэж байгаа эхчүүд эмнэлгийн өрөө олдохгүй коридорт. Одоогийн байдлаар энд, энэ коридорт, энэ сандал дээр, зарим нь шалан дээр 3 хонож байна. Эргэж хөрвөж чадахгүй ёолсон ээжүүд хаа сайгүй. Дандаа л ийм байдаг гээд эмч, сувилагч нар нь бүр энэ байдалд дасчихсан.
ТӨРӨХ ГЭЖ ИРСЭН ЭЭЖҮҮД ШАЛАН ДЭЭР ХЭВТЭЖ БАЙГААД БАЛГАС БОЛСОН БАРИЛГАД ЭНДЭХ ҮҮ?
Дийлэнхдээ эрсдэлтэй жирэмсэн ээжүүд тусламж үйлчилгээ авах гэж 21 аймаг 9 дүүргээс ЭХЭМҮТ-д ирдэг. Гэтэл олон арван жил засвар хийгдээгүй тус эмнэлгийн барилга гаднаасаа хана нь цууралт өгөөд эхэлсэн харагдана.
Саяхан нэгэн иргэн “ Энэ балгас шиг болсон эмнэлэгт анхаарч байгаа албан тушаалтан байтугай ажиллаж байгаа хүмүүс нь ч үг дугарахгүй. Бүхий л нөхцөл байдалдаа дасчихсан хүмүүс болж. Дуугуй суусаар ажилтан, амаржих ээжүүд гээд бүгд нэг өдөр нурсан эмнэлгийн балгас дороос олдох вий дээ” хэмээн цахим сүлжээндээ нийтэлжээ.
