Дэлхийн Эрүүл Мэндийн Байгууллагын судалгаанд 100 000 хүн тутамд дунджаар 9.2 хүн амиа хорлож байгаа талаар дурджээ. Энэ үзүүлэлт Монгол Улсын хувьд 17.9 байна. Өөрөөр хэлбэл Монголчуудын амиа хорлолт дэлхийн дунджаас даруй 94 хувиар давжээ.
Эрүүл Мэндийн Яамны мэдээлснээр нийт нас баралтын 2.4-3 хувь нь амиа хорлосон шалтгаантай байна. Тэр дундаа эрэгтэйчүүд 80-аас дээш хувийг эзэлж байна.
Солонгос улсад 100 000 хүн тутамд дунджаар 28.6 хүн амиа хорлож дэлхийд амиа хорлолтоор тэргүүлдэг бол Монгол Улс удаалж байна.
ДЭМБ-ын 2022 онд гаргасан тайлангаар 10-19 насны долоон хүүхэд тутмын нэг нь сэтгэцийн эмгэгтэй гэх дүн гарчээ. Мөн 15-24 насныхны нас баралтын дөрөв дэх шалтгаан нь амиа хорлолт байгаа юм. Өсвөр насныхныг өвчлөл, хөдөлмөрийн чадвар алдалтад хүргэж буй тэргүүлэх шалтгаан нь сэтгэл гутрал, сэтгэл түгшилт болон зан үйлийн эмгэг байгааг тайланд дурджээ.
Харин манай улсын хувьд зонхилон тохиолдох сэтгэцийн эмгэгийн тархалтын судалгааг ерөнхий боловсролын сургуулиудыг түшиглэн хийхэд 13-17 насны өсвөр үеийнхний 23 хувь нь амиа хорлох талаар бодож, 9.3 хувь нь амиа хорлох оролдлого хийсэн байна. Өөрөөр хэлбэл, ойролцоогоор таван хүүхэд тутмын нэгд амиа хорлох сэдэл төрж, 10 хүүхэд тутмын нэг нь амиа хорлох оролдлого хийж үзсэн байна.
Амиа хорлолт нь нийгмийн, эдийн засгийн, хувь хүний сэтгэлзүйн хямралын зэрэг олон шалтгаантай. Амиа егүүтгэх гэдэг үйлдэл ерөнхийдөө гурван дарааллаар явдаг гэж мэргэжлийн хүмүүс үздэг байна. Нэгд сэдэл, хоёрт шийдвэр гаргах, гуравт үйлдэл хийх. Энэхүү сэдэл, шийдвэр, үйлдэл нь харилцан адилгүй хугацаанд хүн бүрт үүсдэг бөгөөд тухайн нөхцөл байдал, сэтгэл зүйгээс хамаарч зарим нь тухайн мөчид шийдвэр гаргаад гүйцэлдүүлдэг бол зарим нь олон жилийн турш амиа хорлох бодлыг тээн амьдардаг байна.
Амиа хорлолтоос урьдчилан сэргийлэх бүрэн боломжтой. Таны ойр дотны хэн нэгэнд амиа хорлох тухай будал орж ирсэн байсан ч түүнтэй ярилцан сэтгэл зүйд нь нөлөөлж, энэ сэдлийг нь өөрчлөх бүрэн боломжтой.
