Улсын Арслан М.Бадарчийн спортын арбитрын маргааныг нээлттэйгээр шийдвэрлэхээр болсноо Монголын олон улсын ба үндэсний спортын арбитрын дэргэдэх допингийн төвийн Давж заалдах комиссоос мэдээллээ.
Үндэсний их баяр наадмын үндэсний бөхийн салбар хороо, Монголын үндэсний Допингийн эсрэг байгууллагаас гуравдугаар сарын 7-ны өдөр гаргасан хүсэлтийг хүлээн авч ийнхүү олон нийтийн өмнө нээлттэйгээр явуулахаар болсон байна.
Гэхдээ хувь хүний болон төрийн албаны нууцтай холбоотой мэдээллийг задруулахгүй байх үүргийн хүрээнд хэсэгчлэн хаалттай горимд шилжих аж. Хуралдааныг нээлттэй явуулахаар шийдвэрлэсэнтэй холбоотойгоор нэмэлтээр гарах зардлыг хүсэлт гаргасан тал төлөхүүлэхээр мөн шийдвэрлэжээ.
Эргэн сануулахад, улсын наадамд түрүүлсэн М.Бадарчаас S1 төрлийн допинг илэрсэн. Харин тэрбээр шинжилгээний хариуг эсэргүүцэж, барилдах эрхээ сэргээлгэхээр спортын арбитрт хандсан юм.
