Авто замын түгжрэлийг бууруулах зорилгоор өчигдөр замын хөдөлгөөнд өөрчлөлт оруулах "ТУРШИЛТ" хийсэн ТЦА-ны дарга Б.Оюутболдыг ажлаас нь чөлөөлсөн үйлдэл "түржрэлийг бууруулах тал дээр хэн ч юу ч хийхгүй байж бай" гэсэн үүрэг даалгавар шиг ойлгогдож байгаа нь нууц биш.
Түгжрэлд саатсан иргэдийн уур бухимдал Хотын даргаруу чиглэхэд тэрээр НЗДТГ-аас уг шийдвэрийг гаргаагүй болохыг мэдэгдэж, асуудлыг өөрөөсөө түлхсэн. Үүний дараахан Х.Нямбаатарын орыг залгаж ХЗДХ-ын сайдаар томилогдсон Б.Энхбаяр ЦЕГ-ын даргад үүрэг өгч ТЦА-ны даргыг үүрэгт ажлаас нь чөлөөлүүлсэн билээ.
Угтаа бол Монгол Улс Түгжрэлийн сайдтай. Тэр хүн хаана явж байгаад уг асуудлын ард үлдэв. Өөрийн чиг үүргийн хүрээнд ядаж нэг "туршилт" хийгээд ч болтугай түгжрэлийн асуудалд санаа тавьсан билүү? гэж олон нийт түүнийг цахим орчинд сурагласан.
Тэгвэл өнөөдөр "Улаанбаатар-Бүсчилсэн хөгжил" форумд Түгжрэлийн сайд Б.Дэлгэрсайханыг оролцох үеэр өчигдөр түгжрэлийг тойрон өрнөсөн уг асуудалд түүний байр суурийг сонирхоход тэрбээр,
"Тэр хүнийг ажлаас нь чөлөөлөх эрх надад байхгүй. Миний ажлын эрхлэх хүрээ Улаанбаатар хотын түгжрэлийг бууруулах. Ямар нэгэн агентлагаас түгжрэлийг бууруулах гэнэтийн шийдвэр гаргаж, иргэдийг бухимдуулж болохгүй. Нийслэлтэйгээ учраа олж, ажиллах ёстой" хэмээн ярилаа.
Данхар төрийн дарга нарын аясыг харж, тэдний үгээр л хөдлөх сонголтыг тэд төрийн албан хаагчдад үлдээж буйгаа тэд эдгээр үг, үйлдлээрээ тодхон харуулаад авлаа.
