“Улаанбаатар-Бүсчилсэн хөгжил” форум төрийн ордонд үргэлжилж байна. Энэ үеэр Түгжрэлийг бууруулах үндэсний хорооны дарга, сайд Б.Дэлгэрсайхан сэтгүүлчдэд мэдээлэл өглөө.
Тэрбээр "Метротой болох асуудал сүүлийн 3, 4 сар яригдлаа. Иргэдийн зүгээс болно, болохгүй гэж талцаж байна. Метроны төслийг эхлүүлэхээс өөр арга байхгүй. Манай улсад мега төслийг эхлүүлэхэд улс төржих байдлаар ханддаг учраас метроны төслийг шуурхай эхлүүлнэ.
Нийслэлээс бонд гаргах, төр, хувийн хэвшлийн түншлэл, гаднын улсаас хөнгөлөлттэй зээл авах, гүйцэтгэгч компани урьдчилж төлбөрөө гаргах зэргээр метротой болох санхүүжилтийг шийдэх боломж бий.
Метротой болоход цаг хугацаа орно. Метротой болтол найман сарын дотор дүүжин тээврийг ашиглалтад оруулна.
Нийслэл хотыг орон сууцжуулах, авто замын түгжрэлийг бууруулах хуультай болсон. Аль ч оронд түгжрэлийг бууруулахад эдийн засгийн аргыг хэрэглэдэг. Өөрөөр хэлбэл тээврийн хэрэгсэл эзэмшигчид төлбөрөө төлж, явна.
Захын хорооллын иргэд төв рүү ирж, төрийн үйлчилгээг авдаг, их, дээд сургууль нь төвдөө төвлөрснийг задлаад хотын зах руугаа гаргахаар ярьж байна" гэв.
