Монгол Улсын цахилгаан эрчим хүчний хэрэглээ тасралтгүй өсөн нэмэгдэж байгаа ч түүнийг хангах эх үүсвэрүүдийг нэмэгдүүлэх асуудал үргэлж хангалтгүй байсаар ирсэн. Улмаар урд, хойд хөршөөс авах цахилгааны импорт нэмэгдэж, айл кноп дарахад бид эндээ гал алдахуйц хэмжээнд хүрээд буй. Шинэ станцуудын ажилд оруулхын зэрэгцээ одоо байгаа магистрал шугамуудыг өргөтгөн сайжруулах ажлуудыг ч орхигдуулж болохгүй. Тэгвэл өнгөрсөн 2023 онд зургаан байршилд магистраль шугамуудыг өргөтгөн шинэчлэх, шинээр барилга угсралтыг эхлүүлэх ажлыг гүйцэтгэсэн байна.
Тухайлбал, Чингэлтэй дүүргийн нэг болон дөрөвдүгээр хорооны нутаг дэвсгэрт байрлах 4а магистралын өргөтгөл шинэчлэлийн ажлыг хийж хэрэгжүүлснээр Хүүхдийн урлан бүтээх төв орчмын хэрэглэгчдийн дулаан хангамж сайжирч, найдвартай ажиллагааны түвшин дээшилж зуны засварын зогсолтын хугацаа багасч хэрэглэгчдийг хэрэгцээний халуун усаар тасралтгүй хангах боломжтой болжээ. 4а магистралийг бусад сүлжээтэй хослуулан ажиллуулах, схемийн өөрчлөлт хийж ачааллыг жигд хуваарилах техникийн боломж бүрдсэн байна. Хүүхдийн урлан бүтээх төв орчмын хэрэглэгчдийн халаалтын доголдол өнгөрсөн жилийнхээс даруй 40 хувь буурч, ДДТ-47, СУИС орчим доголдолгүй болж дулааны эрчим хүчээр хэвийн хангагдах урьдчилсан тооцоо гарсан.
