Маргааш /03.15/ -аас эхлэн нийслэлчүүд бид автобусанд толгойгоо тоолуулан зорчино. Өнгөрсөн сарын 28-нд хуралдсан НИТХ-ын ээлжит бус хурлын үеэр хотын дарга Х.Нямбаатар энэ талаар танилцуулсан. Автобусад суусан зорчигчдын толгойг тоолох төхөөрөмжийн тусламжтай жолоочийг хянах бөгөөд хүний толгойн тоо, төлбөр төлөлт хоёр яв цав нийцэж байх учиртай юм.
Энэ тухай Хотын дарга Х.Нямбаатар, ""Ирэх гуравдугаар сарын 15-аас нийтийн тээврийн төлбөр тооцооны системыг олон нийтэд танилцуулж, шилжилт хийнэ. Хүний толгой тоолдог төхөөрөмжийг бүх автобусанд суулгана. Ахмад настан, хүүхэд, донор гэх мэт үнэгүй зорчдог хүмүүсийн картыг татаасаар мөнгөжүүлж өгнө. Өнөөдөр автобусны жолооч нар бүгд бэлэн мөнгөний хайрцагтай. Түүнийгээ дэмбээ гэж нэрлэдэг. Өдөрт хамгийн багадаа 30, 40 мянган төгрөг жолоочийн халаас руу орж байгаа юм. Карт уншуулсан хүмүүсийн тоо, толгой хоёр яг таарах ёстой. Тоо таараагүй бол жолоочид шаардлага тавьж эхэлнэ. Миний хувьд карт аваад зарим чиглэлд сууж үзсэн. Автобусны жолооч нүдэн дээр л мөнгө авч байна. Тэгэхээр энэ асуудлыг шийдвэрлэх шаардлагатай" гэж байв.
