Энэ жил цас элбэгтэй байсан учир цаг агаар дулаарсан ойрын өдрүүдэд шар усны үерийн эрсдэл нэмэгдэж байгаа талаар албаны эх сурвалжууд сануулж буй. Мөн болзошгүй эрсдэлээс сэргийлж зарим газрын мөсийг зөөх арга хэмжээг хоёрдугаар сараас хэрэгжүүлж байгаа. Гэсэн хэдий ч хаана, хэзээ газрын гүнээс ус гарахыг тооцоолох боломжгүй талаараа дурьдаж байв.
Тэгвэл өчигдөр /03.13-нд/ Багануур дүүрэгт л гэхэд дөрвөн байршилд шар усны үерээс үүдэн айлын гэр, хашаа, байшин усанд автсан байна.Тодруулбал тус дүүргийн
- 5 дугаар хороо, Нарийний 24 дүгээр гудамжинд 1 өрхийн Б-ийн 8х8 хэмжээтэй байшин усанд автсан байсныг мотопомп ашиглан 30 минут ажиллан усыг соруулж,
- 1 дүгээр хороо, Сургалтын задгайн 8 дугаар гудамжинд 1 өрхийн 4 ханатай гэр усанд автсан байсныг 40 минут ажиллан гэрийг нүүлгэн шилжүүлж, шуудуу татан үерийн усыг гадагшлуулж,
- 4 дүгээр хороо, Рашаантын 1 дүгээр гудамжинд 1 өрхийн хашаа усанд автаж, гэр рүү нь орох гэж байсан тул 30 минут ажиллан шуудуу татаж, усыг гадагшлуулж урсган
- 1 дүгээр хороо, Сургалтын задгайн 6 дугаар гудамжинд иргэн С-ын хашаа усанд автаж байсныг 40 минут ажиллан 15 метрийн урттай шуудуу татан усыг гадагшлуулж урсган тус тус аюулгүй болгосон.
