Өнөөдөр болсон Засгийн газрын ээлжит хуралдаанаар Улаанбаатар хотод худалдаалагдаж буй махны үнэ өртөгтэй холбоотой асуудлуудыг хэлэлцжээ.
Хаваржилтын хүндрэлтэй нөхцөл байдлаас үүдэн махны хангалт нийлүүлэлт, үнэ өртгийн зохицуулалтыг зайлшгүй хийх шаардлага үүссэн. Иймд нөөцийн махыг худалдаанд гаргаад байгаа. Улаанбаатар хотын хэмжээнд 6300 тонн нөөцийн махыг нийт долоон ААН бүрдүүлснийг гуравдугаар сарын 11-ний өдрөөс эхлээд нийт 9 дүүргийн 357 дэлгүүр худалдааны байгууллагуудаар худалдаалж эхэлсэн.
Мах бэлтгэн нийлүүлсэн ААН-үүдийн үйл ажиллагааны зардал энэ хаврын хүндрэлтэй нөхцөл байдлаас шалтгаалан 13,7%-аар өссөн аж. Иймд уг өсөлтөөс шалтгаалаад өрх айл өрхүүдэд очих 1кг махны үнэ хэт их өсөхөөс урьдчилан сэргийлж зарим нэг зохицуулалтын арга хэмжээг авч хэрэгжүүлэхээр болсон байна.
Тухайлбал НЗД-ын эрх мэдлийн хүрээнд зохих шийдвэрийг гаргаж төсвийн зохицуулалтыг хийхээр болсон аж. Тодруулбал килограмм тутамд нь ногдох зардлын зөрүүг ААН-үүдэд олгохоор болжээ.
