Баянгол дүүрэгт байрлах “Номт наран” ерөнхий боловсролын сургууль хичээлийн байраа энэ хаварт багтаан Яармаг дахь Арцатын ам руу нүүлгэх гэнэтийн шийдвэр гаргажээ. Үүнтэй холбоотойгоор эцэг, эхчүүдийн төлөөлөл эсэргүүцэл илэрхийлж эхэллээ.
Тодруулбал, сурагчдын эцэг, эхчүүдийн төлөөллүүд “Бид тус сургуулийг сонгохдоо мэдээж байршил харгалзсан. Мөн хүүхдийнхээ дугуйлан, секцийг сургуулийнх нь ойролцоо зохицуулсан. Гэтэл энэ хаварт багтаан сургуулийг Яармаг руу нүүлгэнэ гэдгийг эсэргүүцэж байна. Арцатын ам ямар хол, Яармаг хичнээн түгжрэлтэй газар билээ. Гэнэтийн энэ шийдвэрийн улмаас хүүхдээ эцэг эхчүүд Яармаг руу зөөх, эсвэл бие даан явуулна гэдэг тун хүнд байна" гэв.
Тус сургууль 2016 онд "Өөрийн сургуулийн байртай" хэмээн бичиж, сурталчилгаа хийжээ. Гэвч өдгөө эцэг эхчүүдэд энэ байраа түрээсийнх, Яармаг дахь байрыг худалдан авч буй хэмээн тайлбарлаж байгаа юм байна.
Сургуулийн төлбөр жилийн 6 сая 900 мянган төгрөг аж. Үүнээс гадна дүрэмт хувцас, хоолны мөнгийг тусад нь авдаг. Цахим платформын төлбөр гэж жилд хоёр удаа 76 мянган төгрөг өгсөн зэргээр эцэг эхчүүд байр сууриа илэрхийллээ.
2023-2024 оны хичээлийн жил дуусахад нэг улирал үлдсэн. Гэтэл "Номт наран" сургуулийн захиргаанаас Яармаг дахь байршил руу нүүнэ гэдгээ шинэ элсэгчдэд урьдчилан мэдэгдээгүй нь дээрх нөхцөл байдлыг үүсгээд байна.
