ЭРСДЭЛТЭЙ БҮСЭД СУУРЬШСАН АЙЛУУДАД УДАА ДАРАА МЭДЭГДЭЛ ХҮРГҮҮЛСЭН Ч ДИЙЛЭНХ НЬ НҮҮХГҮЙ ГЭЖЭЭ

Нийслэлийн төвийн дүүргүүдийн хэмжээнд 1,339 айл халиа тошинд өртөх магадлалтай байна. Яг одоо халиа тошинд өртсөн 219 нэгж талбар буй. Үүнээс долоон айл зөвшөөрөлгүй, 212 нь зөвшөөрөлтэй ажээ.

Халиа тошинд өртөх эрсдэлтэй айлуудад давхардсан тоогоор 1,277 удаа нүүх мэдэгдлийг хүргүүлсэн байна.

 Мэдэгдлийг хүлээж авсан айлуудын 60 орчим нь нөхөн олговортойгоор нүүнэ гэсэн бол бусад нь "Бид нүүхгүй" гэдгээ хэлжээ. Эдгээр айлууд зөвхөн голын ай савд газар олгосноос эрсдэлтэй байдалд ороод байгаа бус усны ундарга хаанаас ч, хэзээ ч гарч ирэх магадлалтай байдаг талаар Нийслэлийн Газар зохион байгуулалтын албаны Кадастрын хэлтсийн дарга Б.Загдсамбар хэлж байв. 

Нийслэлээс гамшгийн үед нүүлгэн шилжүүлэх 348 нэгж талбарыг бэлдсэн байна. Эдгээр байршлыг танилцуулбал:

1. Баянзүрх дүүргийн Хонхор орчимд /радиогийн станцын зүүн талд/ 98, Цагаан даваа орчимд 57 айл
2. Сонгинохайрхан дүүрэгт 22-ын товчооны хойд тал, Ногоон толгойд 145 айл
3. Хан-Уул дүүрэгт Нисэх орчимд 28 айл
4. Налайх дүүрэгт Тэрэлж явах зам дагуу буюу Их амд 20 айлд газар бэлдсэн.

Өнгөрсөн зуны алдаагаа давтахгүйн тулд дэд бүтэцтэй холбогдсон байршлуудыг сонгосон аж. Гэсэн ч иргэд нүүхгүй байгаа нь улам эрсдэлийг нэмэгдүүлээд байна.