Сонгогчдын санал авч, тоолох зорилгоор сум, дүүргийн Иргэдийн Төлөөлөгчдийн Хурал (ИТХ)-д сонгуулийн хэсэг байгуулж, улсын бүртгэлийн байгууллагын орон нутаг дахь газар, хэлтэст уг мэдээллийг нэгтгэн Улсын Бүртгэлийн Ерөнхий Газар (УБЕГ)-д гуравдугаар сарын 6-ны дотор хүргүүлэхээр хуульчилсан байдаг. Ингэхдээ суманд багадаа 200-гаас 2,000 сонгогчийн дунд, дүүрэгт 3,000-аас багагүй сонгогчийн дунд сонгуулийн хэсэг байгуулахаар хуульд заажээ.
Тэгвэл УИХ-ын 2024 оны ээлжит сонгуулиар 2,189 сонгуулийн хэсэг байгуулахаар ИТХ-ууд шийдвэрлэсэн байна. Тодруулбал орон нутагт 330 сум 1,643 багт 1,680 сонгуулийн хэсэг,нийслэлийн есөн дүүргийн 204 хороонд 509 сонгуулийн хэсэг байгуулсан байна.
Өмнөх сонгуулиар 2,070 сонгуулийн хэсэгт санал авсан бол энэ жил хэсгийн тоо 119-өөр нэмэгджээ.
Сонгуулийн тухай хуульд зааснаар сонгогчдыг онцгой нөхцөл байдлын улмаас зохион байгуулалттайгаар тухайн хэсгээс тусгаарлах болон хэсгийг нэгтгэх, шинээр байгуулах асуудлыг санал авах өдрөөс 35 хоногийн өмнө Сонгуулийн Ерөнхий Хорооны зөвшөөрлөөр шийдэх боломжтой аж.
