Дорноговь аймагт 12 настай охиныг хулгайлж, амь насыг нь хохироосон хэрэгт яллах дүгнэлт үйлдэн Дорноговь аймаг дахь Сум дундын эрүүгийн хэргийн анхан шатны шүүхэд шилжүүлжээ.
Тодруулбал, иргэн Г.Гантулга нь 2023 оны 10 дугаар сарын 03-ны өдөр Дорноговь аймгийн Сайншанд суманд такси үйлчилгээнд явж байгаа мэтээр хууран мэхэлж 12 настай охиныг машиндаа суулган авч явж хүчиндэн, улмаар гэмт хэргээ нуун далдлах зорилгоор амь насыг нь хохироосон.
Энэ хэрэгт Эрүүгийн хуулийн 13.2 дугаар зүйлийн 2.1 /Хүн хулгайлах/, 12.1 дүгээр зүйлийн 4 /Хүчиндэх/, 10.1 дүгээр зүйлийн 2.1, 2.4, 2.7 /Хүнийг алах/-д зааснаар яллах дүгнэлт үйлдэн Дорноговь аймаг дахь сум дундын эрүүгийн хэргийн анхан шатны шүүхэд шилжүүлжээ.
Хэргийг эргэн сануулахад, 2023 оны аравдугаар сарын 3-ны өдөр Дорноговь аймгийн Сайншанд суманд хичээлдээ явахаар гэрээсээ гарсан 12 настай охин сураггүй алга болж, эрэн сурвалжлах ажиллагааг зохион байгуулсан. Эрлийн багийнхан гурав хоног охиныг хайж, Дорноговь аймгийн Мандах, Өмнөговь аймгийн Манлай сумын чиглэлээс цогцосыг олж, эрэн сурвалжлах ажиллагааг зогсоосон билээ.
