ОХУ-ын газрын тосны бүтээгдэхүүний дотоод зах зээлийн нөхцөл байдал, эрчим хүчний аюулгүй байдлыг хангахтай холбогдуулан тус улсын Засгийн газрын 2024 оны 02 дугаар сарын 29-ний өдрийн 243 дугаар тогтоолоор арилжааны автобензиний тэр дундаа биржийн арилжаагаар худалдсан, худалдан авсан бүх төрлийн автобензинийг 2024 оны 03 дугаар сарын 01-ний өдрөөс 2024 оны 08 дугаар сарын 31-ний өдрийг хүртэл хугацаанд экспортод гаргахыг хориглох шийдвэр гаргасан байна.
Энэхүү тогтоолын үйлчлэх хүрээ нь биржээр арилжаалагдаж байгаа автобензинд хамааралтай буюу үйлдвэрлэгчээс шууд худалдан авсан бүтээгдэхүүнд хамаарахгүй байхаар заасан байна.
ОХУ-аас Монгол Улсад экспортолж буй бүх төрлийн автобензин /А-80, АИ-92, 95, 98/-ийг манай шатахуун импортлогч аж ахуйн нэгжүүд болон ОХУ-ын Роснефть компани хооронд байгуулсан урт хугацааны шууд худалдааны гэрээний дагуу Ангарскийн боловсруулах үйлдвэрээс нийлүүлдэг.
Иймд тус тогтоолд Монгол Улс хамаарахгүй бөгөөд Монгол Улс руу экспортолж буй бүх төрлийн автобензиний үйлдвэрлэл, ачилт, тээвэрлэлт аливаа нэг саадгүй хэвийн явж байгаа талаар Роснефть компаниас манай талд мэдэгдсэн.
Өнөөдөр буюу 2024 оны 03 дугаар 01-ний өдөр Сүхбаатар боомтоор ОХУ-аас 56 вагон буюу 3360 тонн АИ-92 автобензин, 48 вагон буюу 2880 тонн дизель түлш импортоор орж ирээд байна.
Өнгөрсөн 02 дугаар сард Монгол Улс 74,8 мянган тонн АИ-92 автобензин импортолсон бөгөөд 2024 оны 02 дугаар сарын 29-ний өдрийн байдлаар улсын хэмжээнд 27 хоногийн ердийн хэрэглээний нөөцтэй байна. Мөн манай импортлогч аж ахуйн нэгжүүд 2024 оны 03 дугаар сард ОХУ-ын Роснефть компаниас 70 мянган тонн АИ-92, 1600 тонн АИ-95 автобензин худалдан авахаар захиалсан ба энэхүү захиалгын үйлдвэрлэл, ачилт, тээвэрлэлт саадгүй, хэвийн үргэлжилнэ гэдгийг нийлүүлэгч тал мэдэгдсэн.
Иймд ОХУ-ын Засгийн газрын 2024 оны 02 дугаар сарын 29-ний өдрийн 243 дугаар тогтоолтой холбоотойгоор манай улсын бүх төрлийн автобензинийн импорт, нийлүүлэлт, хангамжид ямар нэг нөлөөлөл үүсэхгүй, үйл ажиллагаа хэвийн, тогтвортой үргэлжлэн явагдах болно гэж АМГТГ-аас мэдээллээ.
