Монгол Улсад сүүлийн арав гаруй жил яригдаж байгаа метроны ажил өнөөдрөөс албан ёсоор эхлэх гэж байна. Өчигдөр НИТХ-аар нийслэлийн 2024 оны төсвийн тодотголын хоёрдугаар шатны хэлэлцүүлэг болж метро байгуулахтай холбоотой эхний ээлжийн санхүүжилт болох 387.6 тэрбум төгрөгийн санхүүжилтийг батлуулсан. Тодруулбал метро барьж байгуулах бүтээн байгуулалтын ажилд 333 тэрбум, тус төслийн зөвлөх үйлчилгээний ажилд 54.6 тэрбум төгрөгийг нийсэлийн төсөвт хотын дарга Х.Нямбаатар том амжицаар оруулж ирээд, торойх зүйлгүй шийдүүлээд авлаа. Харин тэр төсвөө батлуулаад гарч ирсэн хойноо маргааш бид олон улсын тендерээ зарлаж, метроны ажлаа эхлүүлнэ гэж ам бардам мэдэгдэв.
Тэгвэл эх сурвалжийн мэдээлснээр метро барих төслийн Зөвлөх үйлчилгээний олон улсын тендерийг өнөөдөр 12:00 цагт зарлахаар болжээ. Зөвлөх үйлчилгээнд 54.6 тэрбум төгрөгийг зарцуулах бөгөөд уг тендерт шалгарсан компани ТЭЗҮ, зураг төсөл дээр ажиллах, гүйцэтгэгчид хяналт тавих үүрэгтэй байна.
Японы олон улсын хамтын ажиллагааны байгууллага буюу ЖАЙКА-ийн хийж байсан урьдчилсан ТЭЗҮ-д тулгуурлан тендер зарлана.
Монголын анхны метро Амгалан өртөөнөөс Толгойт хүртэл 17,7 км үргэлжилнэ. Хөндлөн сунгаж тогтсон төлөвлөлттэй манай хотын хувьд энэ хамгийн боломжит байршил гэж Жайкагийн хийж байсан дээрх судалгаагаар баталсан аж. Мөн билетийн үнэ 600 төгрөг байхад боломжийн байна гэж судалгааны дүгнэлтэд тусгагдсан байсныг ч хотын удирдлагууд хэлж байсан. Энэхүү метро нь өдөрт 10-12 мянган зорчигч тээвэрлэх хүчин чадалтай байна гэж тооцоож буй.
