Нийслэлийн 2024 оны төсвийн тодотголыг НИТХ-аас баталлаа. Ийнхүү нийслэлийн төсөв анх удаагаа гурван их наядад хүрч байгаа юм.
Нийслэлийн төсвийн нийт орлого нэг их наяд 122 тэрбум төгрөг байна. Үүнээс Татварын орлого 873 тэрбум төгрөг, татварын бус орлого 230 тэрбум төгрөг байхаар төсөвт тусгажээ.
Харин Нийслэлийн 2024 оны төсвийн жилд зарцуулах зарлагын нийт хэмжээг хоёр их наяд 610 тэрбум төгрөгөөр баталлаа.
Төсвийн тодотгол хийх болсон үндсэн шалтгаан нь засгийн газраас нийслэлд их багтаамжийн тээврийн хэрэгсэл буюу метро барих төсвийг нийслэл 2024 оны төсөвтөө суулгаж, НИТХ-аар батлуулахыг хотын даргад үүрэг болгосонтой холбоотой. Энэ ч зорилтдоо хүрч метро барьж байгуулах бүтээн байгуулалтын ажилд 333 тэрбум, тус төслийн зөвлөх үйлчилгээний ажилд 54.6 тэрбум төгрөгийг тодотголд тусгасан нь энэ дүнгээрээ батлагдлаа. Маргаашнаас метроны төслийн зөвлөх үйлчилгээний олон улсын тендерийг нийслэлээс зарлана.
