Монгол Улсын Засгийн газрын 2023 оны 484 тогтоол гарч, Улаанбаатар хотод их багтаамжийн нийтийн тээврийн хэрэгсэл буюу метрог барьж байгуулах, гүйцэтгэгч, менежментийн зөвлөх үйлчилгээг үзүүлэх ажлын холбогдох тооцоо судалгаа, үнэлгээг хийж Нийслэлийн 2024 оны төсөвт тусган, НИТХ-аар хэлэлцүүлэхийг Хотын даргад үүрэг болгосон.
Үүнтэй холбоотойгоор нийслэлийн энэ оны төсөвт тодотгол хийхээр болж, өнгөрсөн баасан гарагт нэгдүгээр хэлэлцүүлэг нь өрнөсөн билээ.
Наанаа засгийн газрын даалгавраар метроны төслийг эхлүүлэхээр төсөв тодотгож буй гэх ч начир дээрээ “Гуя дагаж хүзүү” гэгчээр метроны төсөлтэй хамт сургууль цэцэрлэгийн өргөтгөл, явган замыг шинэчлэх гэх зэрэг ажлууд тодотголд тусгагдаад байгаа.
Сургууль цэцэрлэгийн өргөтгөлийг бол төсвийг батлах чиг үүрэг бүхий НИТХ-ийн төлөөлөгчид битгий хэл нийт Улаанбаатарчуудаар сайшаан дэмжиж байгаа. Харин анхнаасаа стандартгүй зам хүлээж авчихаад одоо түүнийхээ хальтирдгийг гайхаж, шинэчлэхэд 45 тэрбумыг зарцуулахаар болсонд шүүмжлэх хүн цөөнгүй байна.
Нийслэл Улаанбаатар хот 2024 оныг тохижилтын жил болгон зарласан. Тийм учраас нийтийн эзэмшлийн зам талбайг халтирдаггүй, стандартын хавтангаар солихоор төлөвлөсөн. Үүндээ нийт 45 тэрбум төгрөг төсөвлөсөн гэх.
Энэ ажлын хүрээнд Энхтайваны өргөн чөлөө, Чингисийн өргөн чөлөө, Их Монголын өргөн чөлөөг бүхэлд нь байгалийн боржин чулуугаар хотын стандартад нийцүүлж халтирдаггүй явган хүний замтай болгох аж.
Тодруулбал Офицеруудын ордноос Таван шар хүртэл, 32-ын тойргоос Үйлдвэр комбинатыг дуустал, мөн Сүхбаатарын талбайн эргэн тойрон зэргийг нэгдсэн стандарттай “АНСАМБЛ”-тай болгоход 45 тэрбумыг зарцуулна.
Одоо байгаа явган зам болон бродюрын ашиглалтын хугацаа нь дуусчихсан гэх боловч аль хэсгийнх нь зам яг хэдэн жил болчихоод байгаа талаар баримттай тайлбар алга. Давс хужиртаа идэгдээд муудчихсаан гэх.
Нийслэлд тулгамдсан олон асуудал байгаа. Хотын төвөөр тавьсан хальтардаг замаа шинэчлэх гэхийн оронд хотын захаар огт замгүй газартаа явган зам тавина гэсэн бол арай л хөрсөнд буусан шийдвэр байх байлаа. Гэсэн ч хотын дарга захиргаадалтын дэглэмийг нийслэлд мөрдүүлээд хэвшиж буй учир нийслэлийн төсвийн тодотголын 2-р хэлэлцүүлгээрээ аваад л гарах бизээ. Ийнхүү бид өчнөөн жил халтирч бэдэрсэн ансамблгүй замаа засахад 45 тэрбумыг зарцуулах гэж байна. Гэхдээ анхнаасаа ийм замыг тавьсан хүлээн авсан хүмүүст хариуцлагын асуудал яригддаггүй нь харамсалтай
